E lē o ‘asa lava taualumaga o le Faamasinoga Maualuga i vaiaso uma ma vaaia ai faiga lē alofa o sauaga ua tulai mai i totonu o aiga. O se tasi o faafitauli aupito i maualuga le tulai mai pea ma ua aafia ai le toatele o fanau teine a le atunuu.
O le fesili e tulai mai pea ma ua laga foi i lenei vaiaso, pe faamata e ala ona pei ua sasao faaafi lenei faafitauli ona o loo faatuputupulaia pea le tulai mai, pe faamata ua tele lipoti i nei sauaga i lenei vaitaimi ona o lea ua tulai mai tamaitai ma taumafai e faaleo sauaga ua leva lava ona tupu ae sa lē mafai ona tautatala ma faalauiloa.
O aoaoga ua faagasolo e leoleo, e faalapotopotoga o loo nafa ma fanau ma tamaitai sauaina, o ekalesia ma afioaga, ua auga lava i le taofia o nei uiga ua aafia ma mafatia ai sui o aiga e lē o mafai ona faaleo atu so latou manatu i le tulai mai ai o nei uiga ma amio matagā.
O lea e faagasolo i le vaiaso lenei se iloiloga o se mataupu faasaga i se alii e 40 tausaga le matua ua molia i le faamalosi o lona lava afafine atoa ai ma le toso teine. O tuua‘iga uma na ave e le tina o le aiga i le ofisa o leoleo ona ua aafia le la tama ma lē ua molia o le teineitiiti e i lalo o le 16 tausaga le matua.
O le aso la ananafi lea sa valaauina ai le mataupu lenei ma na molimauina e tusitala o le agai atu e faatali le taimi e valaau ai lea mataupu ae maua ma le avanoa o le alii lenei poo le tamā o le aiga ua molia e talanoa ai i le tina o le aiga. E agai atu i totonu o le potu faamasino ua foliga mai foi ua sui le mafaufau o le tamaitai lea e ana le toalua lea ma le la tama ua afaina.
Ua taumafai ina ia toe talosaga le faamasinoga ina ia toe ave i tua le mataupu. E ui o lea e lei talia lea talosaga e le faamasinoga ma ua faaauau le mataupu.
E lē o toe nonofo faatasi lea alii ma lona toalua lea ua alu ma ave le la tama teine ae ua tele mataupu faapenei e pei ona molimau i ai Leoleo ma le faamasinoga, ma e tele lava foi ina toe agai lava tina ma taumafai e toe ave i tua mataupu nei mai le oo atu i le faamasinoga.
E le gata i lea ua iai se teuteuga i le tulafono ua unai e leoleo ina ia faaauau ai moliaga o sauaga mai i le toe faaui i tua. O le mau a le vaega o sauaga a le matagaluega o Leoleo, e tele ina agai atu tamaitai ma fai tagi pe o sauaga faasaga ia i latou pe o sauaga faasaga ia latou fanau ae o leoleo e tele ina fautuaina pe lē iai se isi laasaga e pei o le faatalatalanoa o mataupu ina ia taofia ai le agai sa‘o loa i le faamasinoga.
E ui i ia fautuaga na ta‘ua e sui o lea itu o le Matagaluega i faatalatalanoaga i taimi ua tuanai e lē mafai lava le tauanau o tina. O le taimi la ua alu ina ia tali atu i manaoga o tagi ae oo atu i luma o le faamasinoga ae tulai ane tina ma talosaga i le faamasinoga e faaui i tua ia mataupu.
O lea la ua iai le teuteuga o le tulafono e lē toe mafai ai ona tatala i tua tagi nei pe a faamauina i le ofisa o leoleo ma ua faagasolo i le faamasinoga. O lea ua toe tolopo le mataupu i le alii lea e 40 tausaga le matua i tuua‘iga ua faia faasaga i sauaga i lona afafine ma ua faatali sana tali i ia moliaga i le isi taimi e tulai ai i luma o le faamasinoga.
