Ua mae‘a le fono tele faavaomalo lea na usuia i Samoa mo le Komisi o le Tuna. O se fonotaga e mālie lava le faagasologa ma ua ta‘ua e i latou na auai, o se fono ua lē amanaia ai finagalo o atumotu laiti e pule ma o i latou e ana le Vasa Pasefika.
Ua alu le vaiaso o tauanau e motu laiti o le Pasefika e aofia ai Niu Sila ma Samoa, atunuu tetele ina ia usitaia tulafono ia ua faataatitia e atumotu laiti nei mo le puipuia ma le faasao o nisi o i‘a o le tuna lea ua tausolomua i atunuu tetele e lē pule i le Vasa Pasefika le soona fagotaina. E matuā lē maluelue lava le tele o atunuu tetele nei e i totonu o le Komisi.
O le finauga a Malo Tetele, ia tuu atu ogasami faatulafonoina o atumotu laiti e pule ai latou auā o ogasami tetele i tua atu o atunuu nei e saoloto ai le latou fagota.
O le faafitauli ona o le soona fagota o le tuna aemaise le albacore ma le big eye tuna ua amata lava ona vaaia le faaitiitia, ma a lē faia i ai ni tulafono e taofiofi ai le soona fagotaina, e lē mamao ae vaaia loa le leai o se i‘a ma o le a matuā aafia ai soifua o tagata o atumotu laiti o loo matuā faalagolago i le punaoa faalenatura.
Ua teena e le Komisi o le Tuna le Maliega a Tokelau lea na atoa i le faaiuga o le vaiaso le 10 o atunuu o le Pasefika i Saute ua faamalosia. O se faaiuga sa iai lava masalosaloga o Samoa atoa ai foi le ofisa o Faigafaiva a le Pasefika, ailoga a talia e atunuu tetele o le fono poo le Komisi, ma o le faaiuga o le vaiaso lea na faaalia ai e iai vaega o lenei maliega ua lē talia ai e le Komisi lea feagaiga.
O le feagaiga lenei ua tutu ai atumotu o le itu i Saute o le Pasefika ina ia faamalosia ai puipuiga ma le faasao o le i‘a o le apakoa le ituaiga lea o tuna i totonu o le vasa Pasefika ua iloga le faaitiitia. O le tutu faatasi o atumotu i lalo o lenei maliega na ta‘ua e le FFA o se faailoga o le malosi o le galulue faatasi o atumotu laiti mo lenei taumafaiga.
O Fiti lea na faamautu lana foi lagolago i se sainigalima i le aso faaiu o lea fono tele ae o lea ua lē talia peitai na ta‘ua e se sui o le faigafaiva a Samoa sa i lea fonotaga, e tusa lava pe tetee mai atunuu tetele nei i lea maliega, e mafai lava e atumotu uma ona faamalosia a latou tulafono auā o totonu o ogasami faatulafonoina a atumotu uma lea e unai ai lenei maliega ae sa iai le manaoga e ave le fua lenei ua o latou faataatia i le Maliega a Tokelau e faatino e le Komisi i ogasami tetele i tua atu o sami faatulafonoina a atumotu laiti.
O le mafuaaga ona o ogasami ia o loo fagotaina e atunuu tetele o le lalolagi, o iina foi lea e matuā tele le apakoa ua faapea ona fagotaina ai ma tulai mai ai le faafitauli o le faaitiitia o lea i‘a i ogasami o le Pasefika.
