O le ou o taifau na mafai ai ona oso lē na molia ae tia‘i lē na tagi ae ana leai le ou o taifau ua iai se isi tulaga e oo i ai lē na tagi i lenei mataupu.
O le aso 22 o Iuni o le tausaga nei, na faamaonia ai e le Faamasinoga Faaitumalo le moliaga o le faaoolima faasaga i lē na tulai o Tavita Mativa e 25 tausaga o Aele fou ma e galue o ia o se leoleo fale.
E tusa ai ma le tolaulauga o le ripoti o le itu o leoleo e faapea, o le aso 13 o Tesema 2014 na tulai mai ai lea mataupu. Sa agai atu ai lē na tagi o le tamaitai o Linda ma ona tuagane e faatau. Na mae‘a mai le faatau ae agai loa tuagane a lē na tagi i le latou fale ae tu ai lē na tagi i luma o le auala ma o loo iai lē ua molia i luma o le fale o le latou tuaoi.
Na faateia lē na tagi i le pupuniina o lona fofoga poo le gutu e lē ua molia. Na tago lē na tagi i le lima o lē ua molia e aveese ma e‘e ai loa ma o le taimi lea ua tootuli ai lē na tagi i le mutia.
O le ou o taifau na oso ai lē ua molia e lafi ma avea ai loa ma avanoa na faavave atu loa lē na tagi ua logo ona tuagane. Sa faamatala uma e le tamaitai le mea na tupu e oo lava i laei o lē ua molia.
I le faamatalaga a lē ua molia i luma o le Faamasinoga na ia ta‘ua ai e faapea, o ia sa faasuaavā i lea po na mafua ai ona ia faia ia tulaga.
Sa taumafai lē ua molia e ‘alo mai i le faamasinoga e ala i ana faamatalaga na ia saunoa ai i luma o le faamasinoga ae na iu lava ina ua toe ioe ma faasaoina le tolaulauga o le itu a leoleo.
Na saunoa le afioga i le Faamasino ia Mata Tuatagaloa, o lea e maitau atu e iai ona tuafāfine ae a faia e le isi tama i lona tuafafine lea tulaga e lagona foi lona lē fiafia.
I le saunoaga foi i lana afioga i le Faamasino i lē ua molia e faapea, e iai lana fanau teine ae a alofa i lana fanau teine ia aua le faia.
E fai sina matuia o lana solitulafono auā pe ana le e‘e le teine ma le ou o taifau na mafua ai ona vave uma lana gaioiga.
O lea e talafeagai ai se faaiuga o le Faamasinoga e tuuina atu i lē ua molia le 60 itula e galue ai mo le lelei o tagata lautele.
A toe molia mai loa i se isi tulafono ona mautinoa lea le tapena mai o lana atopau i le Faamasinoga e uma ona lau ona moliaga ma agai loa i Tafaigata e moe ai.
