Ua faalua ona valaau le mataupu ale susuga ile faifeau na aveesea mai ai le tofi Failautusi Aoao ole Ekalesia Faapotopotoga Kerisiano Samoa le susuga Afereti Uili faasaga ile tamaitai o Angie Lesa, e lei oo atu lava le tamaitai e faamaonia le taunuuga ole soalaupulega poo le mediation, lea na ta‘ua ele loia a Afereti ile faamasinoga ua manuia ai lana itu.
E lē o mafai ele faamasinoga ona faamauina ose iuga aloaia ale faamasinoga le finagalo na fausia ile soalaupulega ona e lei oo atu lava le tamaitai o Angie se‘i fesiligia ma avatu sana tali pe moni le finau mai ale loia ale Itu tagi.
Ole vaiaso na tea nei sa fuafua e oo atu ai Angie o ia na faia tuua‘iga ise mafutaga faaulugalii male faifeau, peitai na fiu le leoleo sa tiute ile potu faamasino numera tasi e tau valaau le suafa o Angie e leai se isi. Na faapea foi ile isi valaauga muamua ile tolu vaiaso ua mavae.
Na faia ai male faaiuga ale faamasino sili e ao ile loia ale itu tagi ona momoli ile tamaitai pepa ole faamasinoga e logo iai le mataupu ma fai iai e alu atu ona e manaomia lona auai mole faamaonia ole taunuuga ole soalaupulega.
E lē o mafai ona faalauaitele le taunuuga ole soalaupulega ona ole maliega lea ua taunuu iai itu e lua, peitai oloo manaomia ele Komiti ale Autoeaina ale EFKS le faaiuga ina ia iloilo ai le latou faaiuga na faia lea na faamalolo ai le tofi Failautusi aoao ole Ekalesia sa umia ele susuga Afereti.
Na pau lea ole vaega ole mataupu ua logo ele loia ale faifeau ile Autoeaina e lē mafai ele faamasinoga ona faamauina le taunuuga ole soalaupulega e avea ose iuga aloaia ale faamasinoga ona e lei oo atu le tamaitai oloo faasaga iai le mataupu.
Ole fesili pe faamata e toe maua se isi avanoa e tulai ai Angie Lesa na faia tuua‘iga ile faifeau, e faia sana faamatalaga ile faamasinoga pe faamaonia pe leai le taunuuga ole soalaupulega. Pau lea ole vaega oloo manaomia ele faamasinoga.
Na faaalia ele faifeau o Kerisiano Soti ise lipoti ase faletelevise a‘o tauaofia le fonotele i Malua ile tausaga nei, ole faaiuga ua aveesea ai le tofiga Failautusi aoao ona ua mae‘a ona faamatala ele tamaitai na faia tuua‘iga le mataupu atoa i luma ole Autoeaina.
E faia lea faaiuga ae oloo taoto le soalaupulega e lei maua se faaiuga. Ole filifiliga ale fonotele ua tofia ai mase failautusi aoao fou ua tauaveina galuega faafailautusi. E lē o iloa nei pe toe oo le mataupu ale susuga Afereti Uili ile faamasinoga ona ua faaalia e nisi o molimau e tatau ona faamauina aloaia le faaiuga ole soalaupulega e faamamaina ai lona suafa mai tuua‘iga.
