Ua mae‘a le taamilosaga a le lakapi taitoafitu i le vae i Aferika i le faaiuga o le vaiaso, ma ua lē manuia ai foi taumafaiga a le tatou au taitoafitu sa tausinio ai mo se ‘ai mo Samoa. Lē maua le ipu autu, faia‘ina ia Potukale i le sailiga siamupini o le talita, foi mai ua gau lele le apaau o le Manu.
E ui i lea tulaga ua oo i ai si a tatou aulakapi, peitai e lē masino le tapuaiga a le atunuu atoa, auā foi e lē uma ai ii se taamilosaga, o loo loma foi le vae i Ueligitone ia Fepuari o le tausaga fou.
E mautinoa le tele o nei vaiaso o le a malolo ai ma se‘i tau fōfō ai manu‘a o le Manu, e toe oso foi le la.
O le aso 13-14 o Tesema i le faaiuga o le vaiaso na faagasolo ai le taitoafitu lea i Aferika lea na faia i le Port Elizabeth Bay Stadium, lea e 16 aulakapi taitoafitu faavaomalo na auai ai e aofia ai ma le Manu Samoa. I le mae‘a ai o le taamilosaga, manumalo ai Aferika ia Niu Sila i le ipu autu i ‘ai e 26 i le 17.
O le Pool D na tausinio atu ai Samoa faatasi ma Niu Sila, Egelani ma Iapani, ma i le mae‘a ai o le vae lea i Afelika, o Samoa o loo tulaga fitu i le faatulagaga o ‘au i lona aotelega.
Na mamao lava se faaiuga e ono soso Samoa i le ipu autu ina ua mae‘a taaloga o pool games na manino ai lava le lē au o le lele a le Manu i le toalima pito i luga o le taamilosaga ina ua faavavai muamua e Niu Sila ma Egelani.
Manumalo Niu Sila i le Manu Samoa i ‘ai e 24 i le 7 a Samoa, taalo ma Egelani, toe malolo foi, 22 i le 7 a Samoa i taaloga muamua o pool games. Moe lea o le toa ma le faamoemoe maualuga e ono lami ia Iapani i le aso na sosoo ai o le taamilosaga. Auē! e sa‘o ai le tagi uu a le isi loomatua, ‘ua na o mea gegefu lava’.
Toe felelei lava tamai vaalele a Iapani i minute mulimuli o le taaloga ma faoa le manumalo, le latou numera 10 na tataoa le polo, ae ofo i le faaletonu o le tatou puipui mai, toatolu na pueina le Iapani ae lē mafai ona taofi le sikoa?
Faia‘ina ai lea o Samoa i ‘ai 17 i le 14 a le Manu Samoa. Na pau lava le manumalo a Samoa o le taaloga ma Zimbabwe 21 i le 14, lea na sao ai i le final o le Shield.
Tasi le faamoemoe na totoe o le tuu atoa loa i ai o le malosi e finau se manumalo mo le talita i le taaloga ma Potukale. Ae ua siliga tali i seu se taumafaiga, ua leai lava se avanoa e toe finau ai se manumalo. Se tasi o taaloga mataina, peitai vaivai lava le puipui mai ma ua vaai foi i le tele o le pue e misi, masalo ua tele le faitio ae laititi le tapuaiga o taaloga a nai tama.
E toe oso foi le lā, e ui e lei manuia le taumafaiga mulimuli, manumalo Potukale i ‘ai e 19 i le 14 a le Manu Samoa, ae mea sili e leai se tasi o faamanu‘alia i lea taamilosaga. O le aso 6-7 o Fepuari lea ua faamoemoe mo le vae i Ueligitone e pei ona masani ai, manatu o le a toe tapena mai i ai le Manu mo se suiga fou i le tausaga fou.
