O le ki o le 21 tausaga e lē o se ki e tatala ai le mafutaga ma mātua

Na matuai faatumulia le hall a le Hosanna Church i Logan i le po o le Aso Toonai talu ai, aso 7 o Mati, i le toatele o uo ma aiga sa molimauina le faamanatuina o le 21 tausaga o le tamaitai o Niveh Timoteo, o se alo e faasino i se tasi o tamalii faipisinisi i Brisbane le afioga ia Galumalemana Tagaloa Naea Harry ma le faletua ia Wendy Apu Timoteo, o loo lagolagoina alaleo ma le mamalu o le atunuu (Eva Salelesi, Malie ma Lotofagā Safata).

O le susuga ia Bishop King o le Logan Ward sa avea ma Taitai, o mafaufauga faaleagaga sa feagai ma Bishop Papaliitele T Papaliitele, a o le afioga i le Sea ia Rev Falema‘i Mika o le Ekalesia Evagelia Uesiliana Metotisi sa saunia se tatalo ona alo lea i faafiafiaga ma polokalame o le po.

Sa faafeiloaia le auvalaaulia ma faatautaia le po e Papaliitele Viliamu Papalii. Na leai se isi e emo i le matagofie o faafiafiaga aemaise o le mālie o le faaili na faia ai se faamalositino i le mamafa ma le maoae o le felanulanuai o le taumafataga.

Na lelei tapena ma matagofie mea uma auā sa amataina le faamoemoe i le viiga o le Atua, iu i le manuia, ta‘ape le aofia ma le vaa ua goto ma le mama ua lomi.

Alofaaga ma faamanuiaga mo lou 21 tausaga Niveh, molimoli atu i ou uso ma tuagane ma fanau, Kaffy Timoteo ma si ana tama, Ese & fanau Dianne ma Mika & fanau, aunties ma uncles, cousins ma Aiga uma lava ae faasilisili ai alofaaga e lē mavae mai ou mātua ia Galumalemana Naea Tagaloa Harry & Wendy Apu Timoteo.

Afioga i le Aloalii ia Galumalemana Naea ma le faletua ia Wendy Apu Timoteo ma si o la alo ia Niveh na faamanatu lona 21 tausaga