E oo mai lava ile taimi nei e le o manino lelei lava le mafuaaga ua faamalolo le tumau ai le sui Komesina, le afioga ia Samoa Mulinuu Mulinuu mai ona tofiga, e ui na faailoa ele Sui palemia, le afioga ia Tuitama Talalelei i lana saunoaga i luga o le TV 1, ole faamalolo lē tumau ai o Samoa, e mafua mai lea ini faaletonu oloo tulai mai i totonu ole matagaluega. Peitai, oloo teena ele Sui komesina oloo tauaveina nei galuega ale komesina, le susuga ia Leiataua Aviga Salale lea tulaga. Na ia ta‘ua, ole faamalolo lē tumau ai o Samoa Mulinuu ose faaiuga na faia ele Kapeneta, e leai sona malamalamaaga ile mafuaaga.
E lē o mafai foi ona faamaonia mai e Leiataua pe iai se sootaga ole faamalologa o Samoa ma le mataupu na aafia ai le Komesina o leoleo. Na ta‘ua foi e Leiataua, e oo lava ia Samoa nate lē o mautinoa le mafuaaga tonu ua faamalolo lē tumau ai o ia mai lana galuega.
Na faailoa foi ele Sui Palemia, ole a iai se suesuega faapitoa e faia faasaga ile Sui Komesina, peitai, e lei mautinoa ile taimi nei poo afea e amata ai lea suesuega. Oloo galulue le ofisa ole Loia Sili ale malo e tapena le suesuega e pei ona ta‘ua. E leai ni mea faapenei na aliali muamua mai ile matagaluega a leoleo, ua fesiligia ai foi ele atunuu le malu ole galuega a leoleo ile taimi nei. Na saunoa le afioga ile Minisita o leoleo le afioga ia Sala Fata Pinati oloo lelei pea le faatinoga o galueg a leoleo e ui i vevesi oloo tulai mai ile taimi nei. Talu mai ona suia le faiga fou ua iai nei e pei ona tofia ai sui komesina se toatele, ua aliali mai lava faaletonu.
Ise molimau a se tasi o leoleo sinia e lei manao e faailoa lona suafa, o faaletonu i totonu ole matagaluega e mafua mai lava ile eseesega o manatu a i latou oloo faauluulu iai le matagaluega.
