Lau afioga i le peresetene Ekalesia Metotisi Samoa ma Atunuu e mamao, le peresetene faaagaga, le fofoga o le koneferenisi, le nofo a Sea, Sinoti e fia, le saofaiga Tamā malolo manumalo, le aufaigaluega galulue, aemaise le aoaotetele i tupu ma e‘e, aiga ma o latou tama, tama ma o latou aiga, le nofoa to‘o i faleupolu totofi o Samoa ua malu ai le ekalesia i ona upu fai i fafo ma fale.
Le suafa o Keriso manumalo ou te ofo alofa atu ai, malo le soifua manuia, faamalo le lagi e mamā ma le faato‘ato‘a i le galuega a le Atua. Faafetai i lau tapuaiga ma lau tatalo i le Atua, auā au lupe faalele o loo saili mafua itu e fia o le lalolagi auā tapuaiga i le Atua Soifua.
Ua maua se avanoa i le Newman University England. Ua kini ma ua tau le ‘ai e pei o le upu i tapalega i vai, Master of Arts in Theology and Transformative Practice. Viia le Atua!! O la‘u tatalo faamanuia le Atua i le aiga peresetene ma le aoao tetele o le Ekalesia Metotisi Samoa.
Lau afioga i le Sea, Rev Masunu Utumapu, tausi matagaluega ma le faletua, tina malolo manumalo, aiga ma tapaau, le faafaleupoluga, matua tausi ma le nofoamatafale Ekalesia Metotisi Samoa Manukau City “Fale Papa”.
Faafetai i lo outou tulivae i le Atua ona o au tamafanau, o loo taasē i le tala lelei, ua tau i manū le faamoemoe foi le viiga i le Atua, i le agaga fiafia ma le loto ua malie ai i luma o le Atua. Ia faamanuia le Atua i le matagaluega, mai ona Ao seia oo i ona Iu, faafetai.
Perth Samoa Uniting Church, faafetai mo lo‘u valaauina. O la Iesu, soo se mea o iai se to‘a 2 pe to‘a 3, e ta‘uta‘u ai lo‘u igoa ou te iai faatasi ma a‘u. Faamanuia le Atua ia te outou.
Faafetai i o‘u aiga, aemaise ē na mua i malae i le manūina o le upu a le Atua. Ua malolo manumalo nisi, a o loo faaauau pea le mau ma le tofa momoli a le Atua i fata faitaulaga e fia e nisi. Faafetai le fai tatalo, soo se faiva e sii ae tapuaia e manuia.
E sili ona ou faafetai i mātuagalua i la outou tapuaiga, faapea foi uso ma le tuafafine, taitoalua ma fanau, ou te faafetai foi i si o‘u toalua ma le fanau pele, faamalo fai tatalo. O lea sa outou po le fala, ma tu‘i le muliapapaga ma feula mulila ona o lo‘u faatauvaa.
Ua tali le Atua i la outou tatalo, aua ne‘i ia te i tatou, aua ne‘i ia te i tatou, a ia tuuina atu i le Atua le viiga nei ma aso uma e lē aunoa. O saafiafiga a le tama Eperu, a uma ona tatou faia o se galuega, o i tatou o auauna lē aogā.
Faamanuia le Atua i lana Ekalesia aemaise Samoa ma le lalolagi atoa ona o Iesu, Soifua.
Rev Karama Manutui Leilua Ofisa Ioapo
