O le saunoaga lea a le Taitaifono o le Komisi o Galuega a le Malo, le fetalaiga Tuuu Ieti Taule‘alo i se faatalatalanoaga i le mataupu ua faamalolo lē tumau ai ni faauluuluga o Matagaluega e lua a le Malo, le Matagaluega o Faamasinoga ma Pulega o galuega faa-Faamasinoga le tofa Masinalupe Tusipa Masinalupe, atoa ai ma le Komesina o Faigapalota, le susuga Papalii Malotau Malietoa.
O le vaiaso na tea nei lea na faamaonia mai ai le logoina o nei taitai o ia ofisa a le Malo i le faaiuga lea a le PSC ina ia malolo mo se taimi seia faatautaia ni suesuega e faatatau i ni tuua‘iga ua fesiligia ai le faatinoga o le tautua a nei tamalii o le atunuu.
“E lē faapea ua faamalolo lē tumau ona faapea lea ua soli se tulafono, ae o se faavae foi o galuega lelei,” o le saunoaga lea a le afioga i le taitaifono o le PSC.
O lana faamatalaga e ao ona toesea Ofisa Sili nei ae sei faagasolo suesuega a le PSC i o la ofisa. O le popolega lava e pei ona ta‘ua e Tuuu o le faafaigofie lea ona faatino o a latou foi galuega o le leai o i laua o loo tuua‘ia ma ua laga ai ni masalosaloga, i ofisa a o faagasolo ai suesuega, nei avea lo la iaima auala e faigata ai ona maua tonu lava le moni o suesuega o loo faia nei.
E lei faalauiloa le mafuaaga o le faia o nei suesuega ae ua taunuu mai lipoti i le tatou nusipepa e faapea o loo aofia i tuua‘iga nei le toe sui o se faaiuga a le Kapeneta na faia i se tupe maua e se tasi o i laua nei auā fonotaga na auai atu i ai. O le isi o ni faaseā mai i ni aiga e faatatau i mataupu ua tapa ai se fesoasoani lea ua mafua ai ia suesuega.
Na fesiligia le tofa ia Tuuu Dr Ieti ae na ia ta‘ua e lē o se tulaga fou le suesue faapea o faauluuluga o Matagaluega, o le itu lava lea ua iai le faatinoga o galuega a le Komisi latou, a iai ni faafitauli e oo atu i le Komisi o le a faapea lava ona suesueina ma e lē o ni ofisa sili poo ni faauluuluga muamua nei ua suesueina i mataupu e laga mai i totonu o o latou ofisa.
E lē o iloa poo le ā le umi o lenei suesuega ae na ta‘ua e leTaitaifono o le a faapea ona vave ona faatino lenei suesuega ina ia aua ne‘i toso fua lenei mataupu.
