Lē faamaonia moliaga faiaiga faamalosi

“Sa tuu atu i le Tamā faalelagi lenei mataupu, ae o lea ua aumai le tali o se fiafiaga lea ia i matou o le aiga o Faae‘e”. O upu muamua ia na mamulu mai le finagalo faaalia o le tina o Asolupe Te‘o o Solosolo, o lana tama le alii o Faae‘e Te‘o sa tuuaia ma molia i moliaga e 5 o le faiaiga faamalosi ma le ave faamalosi o se tagata e aunoa ma se malie i ai. O se tamaitai 41 tausaga le matua o le soifua, na tagi i leoleo faasaga i lea taulealea. Na tulai mai le mataupu lenei a o galue Faae‘e o se leoleo o le Malo, lea sa galue ai i le vaega o le faaili, ma le vaega o le auaunaga lautele le General Policing poo le GP.

E toafā faatonu sa iloiloina molimau a le itu tagi ma molimau a lē na molia, lea na taunuu ai le latou faaiuga auaufaatasi ua lē faamaonia moliaga o le faiaiga faamalosi ma le moliaga o le ave faamalosi o se tagata (abduction). O le mae‘a o le faamanatuina o le Eseta na amata ai ona suesueina moliaga o le alii sa avea ma Malu o le Malo. Sa molimau le tamaitai na tagi ma ia faamatala ma loimata i nisi taimi o lana molimau tuu fofoga, a o tuliloa i fesili a le loia a le itu tetee gaioiga uma na aliali mai i le po o le aso 5 o Tesema 2009.

Sa molimau le tamaitai i le faamalosia o ia mo se faigaaiga, lea na tulai mai lea gaioiga e pei ona ia faamatala i lana molimau i se vaega o le vaitafe o loo i Fagalii-uta e lata i le malae tapolo o loo iai. Fai mai le tamaitai (taofia le suafa e le faamasinoga) i lona taumafai malosi e unai ese lē na molia a o taoto faamalosi atu i ona luga ae ua leai ni ona lavalava. Na ia molimau foi i le faaaogā e lē na tuuaia o lona malosi e faatino ai lea gaioiga ina ua faaoolima ia te ia, ina ua musu ma taumafai e tetee ese le alii.

O le lipoti a le falemai na siakiina le tamaitai o loo faaalia ai e faapea, e leai ma se mau e faamaonia ai na faia se faigaaiga. O le faaiuga ua aumai e le laulau o faatonu ua faafiafiaina ai mātua o le alii o Faae‘e aemaise o le tapuaiga a ona aiga. Peitai ua matuā teena e le tamaitai na tagi ma lona toalua faapea lona aiga sa tapuaia le mataupu. O le faamatalaga a le tamaloa (toalua o le tamaitai) na ia faailoa ane ai i tusitala, ua vaivai tele le sailiga o le amiotonu ma o le a vaaia ai pea le saoloto o tagata e faia soligatulafono o le faiaiga faamalosi.

Na lūlū foi le ulu o le tamaitai na faia le tagi ma ia faamatala lona matuā ofo tele i le faaiuga, ma sa ia tuuaia ai le suesuega na faia e leoleo.

Fai mai le tamaitai e iai lona talitonuga e lei lelei ona faatino le suesuega a leoleo ma o le mafuaaga lea o le lē atoatoa o mau na tuuina atu e lagolago ai lana tagi. “O le a tuu pea i luma o le Atua lenei tulaga ua oo i ai”, o le faamatalaga lea a le tina o Asolupe o le tuaā o Faae‘e. Fai mai o ia sa tuu foi i le Atua e aumaia le tali moni ma faailoa mai le lē talitonuina o tuuaiga lea ua faamamāina ai le suafa o lana tama. E lē o iloa se aso o le a aumai ai se faaiuga a le faamasinoga i le moliaga o le faaoolima ua ioe i ai Faae‘e Te‘o. Na pau lea o le moliaga na ia ioeina.