Le Eseta ma lona faamanatuina matagofie i gagana eseese

O se faamanatuga matagofie o le Eseta na faia, e lei faatamala ai autalavou e tolu mai le ekalesia o Tagata o Atumotu i Porirua, ia Tokelau, Atu Kuki, ma Samoa i tapenaga eseese o le faasologa o le tala i le Eseta. O le afiafi o le Sapati lea na faamanatu ai le toetu mai o lo tatou Faaola, na faatumulia ai le malumalu o le Christ the King i le ekalesia, uo ma ē masani e molimauina le Eseta.

Na amata le sauniga i le saunoaga faafeiloai a le susuga i le Peresetene o le Kautalavou Tokelau ia Teaku Petaia ona saunia loa lea o le tatalo puupuu na saunoaina e le susuga i le Faafeagaiga ia Rev. Perema Leasi.

O le Autalavou a le Itupa Samoa na latou amataina le polokalame i le faatinoga o le faamasinoga o le Alii.

E lei faatamala le Faamasino Sili na feagai ma le faamasinoga o le Alii, le Fofoga o le Ekalesia ia Lio Fanaea Paese, faapea ma le loia a le malo o Iutaia na faatinoina e le sui teutupe o le ekalesia ia Elisapeta Tamati, a o le loia a Iesu na feagai ma le failautusi o le Itupa Samoa, Le‘autuli‘ilagi Sauvao.

O le afioga i le tiakono ia Vaafusuaga Faafetai Salanoa na fai ma Iesu, a o Rosalote Tanoi ma Lupe Aitogi na fai ma leoleo na avea Iesu e faatino lona faasalaga.

Na sosoo le vaega e lua i le faasatauroina o Iesu na feagai lea ma faatinoga a le Mapu (Autalavou) mai le itu a Atu Kuki, ae o le toetu mai o Keriso na faatinoina e le Kautalavou mai le itu o Tokelau. Sa ese foi le faalogona i lea aso ona o le gagana lava a le atumotu ia na faaaogā e i latou mai Autalavou e tolu.

E masani i tausaga taitasi ona faatasi nei Autalavou ma galulue i le faatinoga o le maliu ma le toetu mai o Keriso, ma e lei faatagā faia lenei tapenaga i vaiaso e lua a o lumanai le Aso Maliu ma le Eseta.

O le auga o le faaaogāina o le gagana a le atumotu latou i nei tapenaga uma, aemaise le tatai pea o tupulaga i le Aso Maliu ma le Toetu o le Mesia. O se faamoemoe aogā ona o le tele o le tupulaga talavou ua galo la latou gagana na tutupu mai ai mai o latou tuaa, aemaise nai mātua na soifua a‘e i Niu Sila nei, ua aogā lea e toe fafagu ai le gagana a le atumotu lava latou ma ona tagata.

Na toe saunia loa e le faafeagaiga ia Perema Leasi le tatalo faaiu faatasi ma ana saunoaga faafetai i autalavou e tolu mo faatinoga uma, ona faaiu lea o le sauniga matagofie i le PIC House mo le taumafataga na saunia lava e sui uma o Autalavou taitasi.

O Iesu o loo tulai faatinoina e Vaafusuaga Salanoa