“O aso faapenei e manatua ai le tina. Ua lē atoa lo‘u fiafia ina ua lē aulia mai e lo‘u tina ia Litara Fanene Tamala lenei aso faitaulia o lo‘u olaga talu ona ma valavala i le oti”…o le molimau lea a Sam i le aoauli o le Aso Sa, aso 11 o Ianuari a o molimauina e le toatele o ona auaiga mai isi vaega o Kuiniselani, Melepone, Sini ma Samoa lona aso soifua.
Na taitaia le sauniga e le faafeagaiga o le Ekalesia Aso Fitu o le Toe Afio Mai i Logan City, susuga ia Pr Samuelu Afamasaga faatasi ai ma le lagolagosua a le faafeagaiga mai Vitoria le susuga ia Pr Aitui Fanene.
Sa fai lava ma Fofoga o le aso lona tuaa ia Notoa Tamala Samuelu, ae o le tautalaga ia Faiumu Taula Faaeteete Faiumu Ioane mai Samoa sa tu tootoo e fai ma fofoga o aiga na lua e faafetaia le paia o le auvalaaulia.
Ua loaloa tausaga o mafuta Sam ma si ona tina ia Litara Fanene Tamala e ala i le la tausavali i fomai ua aunoa ai ma se toe alu i le aoga ona o le tausiga o si ona tina. E leai so latou tuafafine ae ua na o ia ma lona uso laititi o Sensi faapea lona uso matua o Senetenari sa feagai foi ma aoaoga i le Iunivesite lea ua mae‘a ma ua faiaoga i le taimi nei.
Na ia ta‘ua e moni o loo tumutumu mai ona auaiga e faamanatu lona 21 tausaga ae peitai, e lē o atoa lona fiafia ona ua lē vaai i si ona tina na tigaina i le faiga o le tausiga o i latou ma ona uso.
O le itu sili ona faafetai ai Sam i le Atua ona o le tali mai e ala i lana tausiga o si ona tina lea ua fua mai e ala i aoaoga. E ui ina umi se taimi e lē o toe aoga peitai, se mea lava ina a manaia o le tausi matua, e eseese auala a le Atua.
O Samsidu o lona tausaga lona lua lenei i le Iunivesite o Griffith o loo aoaoina ai lona faaailoga o le Bachelor of Humuan Services.
Tau ina ia manuia lou taumafai ma ia iu manuia e ala i le agalelei ole Atua! Alofaaga mai ou aiga uma lava i soo se tafa o Ausetalia, Niu Sila, Amerika ma Samoa ae faasilisili ai alofaaga mai lou tamā o Tamala Samuelu, lou uso o Nari ma Valery, lou uso o Sensi faapea Vai.
