Laveai e le Warratahs le pologa o le Super Rugby a Ausetalia

Taimi lea na tuli ai i tua  ma le taaloga Tavita Nabura
Taimi lea na tuli ai i tua ma le taaloga Tavita Nabura

Ua laveaia e le Warratahs a New South Wales le nofo pologa o ‘au Super Rugby a Ausetalia i ‘au a Niu Sila (NZ). E atoa lelei le 722 aso e le  manumalo se ‘au a Ausetalia i se ‘au a NZ, peitai o lea ua ea le pologa ina ua manumalo le Warratahs i le Highlanders 41-12 i Sini i le o le Aso Toonai na tea nei.

Na fesoasoani le Highlanders i le malo o le Warratahs, ina ua faasala i le Pepa mumu le uigi (Tevita Nabura) a le Highlanders. E 63 minute na taalo ai le Highlanders na’o le 14 tagata i le malae, ae e 10 minute na taalo ai le ‘au na’o le 13 i totonu o le malae ina ua sala Pepa samasama le isi foi tama taalo a le Highlanders.

Na tuli i tua  Nabura ina ua ia aaina faa-kung fu foliga o Cameron Clark le uigi a le Warratahs. o Clark o le atalii lea o Greg Clark le alii faasalalau Ausetalia na fofogaina le taaloga lava lea i le po o le aso Toonai. Na faigofie lava le faaiuga a le alii laufali o Brendon Pickerell (NZ) i lea solitulafono, o le tuli lea o Nabura mai le taaloga ma taalo le atoa ai le ‘au a le Highlanders.

E tolu minute talu ona tuli i tua Nabura ae toe faasala foi ma Aaron Smith i le pepa samama ma faamalolo ai mo le 10 minute ma toesea ai ma le isi toatasi mai i luga o le malae.

Na faaaoga lelei e le Warratahs lea avanoa e maua ai a latou ‘ai. Na faateteleina le malosi o le ‘au i le afa lona lua i le faaopoopo o ‘ai e 26 na maua ai ona ai e 41. E lua sikoa a Folau ma isi sikoa faaopoopo a Lalakai Loketi ma Curtis Rona. Mo le Highlanders e na’o le lua sikoa na tali ai atu ai i sikoa e ono a le Warratahs.

Blues 24 vs Crusaders 32

Ua ea le pologa o Ausetalia ia Niu Sila, ae o loo nofo pologa pea le Blues i ‘au lava a NZ. Na asiasi le Crusaders i Eden Park mo le taaloga lenei, e lei iai ma se foliga o le a tau faaletonu le ‘au a le Crusaders. Na vave oo ‘ai o le taaloga i le 22-5. E uma le afa muamua ua 29-12 le Crusaders. E ui na toe faamalosia le Blues i le afa lona lua ae na mausali le puipui a le Crusaders na taofia ai le tele o osofaiga a le ‘au a Aukilani. O le vaiaso fou o le a feiloai ai le Crusaders ma le Hurricanes i Kalaiesetete. Ae o le Blues e malolo lelei.

Hurricanes 38 vs Reds 34

Na toe fiti mai le Reds i lana faiaina leaga ia Iapani i le vaiaso na tea nei ma faataufetuli le Hurricanes i lona lava malae. E manaia tele le taaloga aua e lei vava mamao ‘au e lua i le taaloga atoa. O le afa o le taaloga e 24-20 le va o ‘ai mo le Hurricanes. Na vaaia foi le matautia o le taalo a le alii NZ talavou o Tanila Tupou i lana sikoa na maua ma le isi sikoa a le Reds na ia amataina. O le sikoa a Tupou na vava lalata ai ‘ai 31-27 ae toe maua loa ma le isi sikoa a le Hurricanes (Lousi) ma oo ai le ‘au i ‘ai 38-27. E ui na toe sikoa Samu Kerevi ae ua mamao i luma ‘ai a le Hurricanes, ae ua uma foi ma le taimi.

O le isi ‘au a NZ na taalo i le aso Toonai o le Chiefs na faiaina i le Sharks 24-28. Talu ai ona e toatele tagata o le ‘au e lei avanoa mo le taaloga i Aferika i Saute.

Faaiuga o Taaloga Vaiaso 14

Hurricanes 38 Reds 34

Sunwolves 26 Stormers 23

Blues 24 Crusaders 32

Warratahs 41 Highlanders 12

Sharks 28 Chiefs 24

Lions 42 Brumbies 24

Jaguares 54 Bulls 24

Taaloga o le vaiaso fou

Crusaders vs Hurricanes

Chiefs vs Warratahs

Reds vs Highlanders

Bulls vs Brumbies