O le faamatalaga lenei a se tasi o tamaitai talavou, ua 18 nei ona tausaga, ma o loo i lalo o le tausiga a le Toomaga mo ē Puapuagatia i Tuanaimato. Ua taofia lona ata, suafa ma le nuu mo le saogalemu.
O se tala fiafia, ina ua ia manumalo mai sauaga o feusuaiga na faia iai e lona lava tamā moni ia te ia. “Ua leva ona maliu lo’u tina, e lē tele foi so’u iloa o lo’u tina, poo ni mea ou te manatua ai lo’u tina moni. Na tuua lava a’u ma lo’u tuagane e lo ma tina, ae alu toe fai le isi ona toalua i le isi itu o Upolu. Ma maua ai le isi ana fanau o le teine foi ma le tama. Ae tausi ai loa ma’ua ma lo’u tuagane e lo ma tamā ma matou nonofo ai lava i lona aiga.”
“Sa na’o matou lava le matou fale, ou te alu i le aoga, ma tuua mai, ae ua iai foi lo’u tamā. Ou te manatua poo le 16 o tausaga o lo’u olaga na amata ai ona sauaina a’u e lo’u tamā, e ala i le lotelote lea o o’u itutinosa (tulou), ma na faaauau ai lava lena faiga, ia te au, ma ia faamata’u a’u, e sa sa lava ona ou ta’uina ia amioga na te faia ia te au, ise isi. Ma sa ia faapea mai foi, afai ou te alofa ia te ia, aua ne’i o’u ta’uina i se isi.”
“Sa ou usitai i lo’u tamā, talu lo’u fefe iai nei ia faia se isi mea faasaga ia te au. Ua faaauau ai lava ona sauaina a’u e lo’u tamā, ma oo ai lava ina o’u ma’itaga. Ua ou masalosalo ua amata ona talanoa ai le matou nuu, auā e oo lava isi o’u tuagane ua ia iloa foi.”
“Peitai sa matua’i faasā lava e lo’u tamā ona ou talanoa i se tagata pe ou te alu foi i fafo ma le fale. Ma faaauau ai lava lana sauaga faasaga ia te au. O taimi ou te alu ai i le aoga, ma vaavaai i isi teineiti, ou te momoo, ia ou faapei o latou.”
“Amuia latou ai o kisi iai o latou tina, faatoa o ai i le aoga. Tele o taimi ou te mafaufau ai lava faapena. Ua alu aso, e na’o lo’u alu lava i le aoga, tuua mai o’u nofo i totonu o le matou lava fale i le aiga o lo’u tamā.”
“A alu lo’u tuagane e faigaluega, e tolotolo mai lo’u tamā ia te au. I le taimi ua ou ma’ito, ae nofo lo’u tama ma tuua’i i le fanau a lona tuafafine. Fai mai, e le o ia ou te ma’itaga ai, ae ou te toe ma’itaga lava i lo’u tausoga.
O tausoga nei, e le mafai ona ou talanoa pe latalata iai, auā e faasā ai a’u. Peitai, na i’u lava ina maua, ma ia tuua’ia ai ona tei, ae ia teena lona faia o se feusuaiga faamalosi ia te au.”
“O lana tala lava e fai mai pea ia te au, afai ou te alofa ia te ia, aua ne’i ta’uina i se isi.
Ma sa faapena ai lava ona ou usitai iai ona o lo’u fefe iai. Ma lo’u maasiasi pe a iloa ane e nisi.”
“Ae ua alu ai lava aso o lo’u mafatia i le tagata lea ua tupu i lo’u manava, ae na faate’ia lava a’u ina ua o atu ni tagata ou te le iloa pe masani ai foi.
Ou te faafetai, e taunuu atu tagata nei, e le o iai lo’u tama i le fale. Ae pe na faapefea foi ona iloa e nei tagata ese o’u mafatiaga na ou nofo ma a’u, ou te talitonu na auina atu e le agaga o le Atua.”
Sa fetaui le faamatalaga a le afafine lenei ma le taeao na faafuase’i ai lava ona usupo le pule o le Toomaga i le ofisa i Apia.
Na talanoa ai le Susuga Siliniu Lina Chang, “Ua faaauala atu i le au fagogota le agaga o le Atua. Talu ai ua umi se taimi o latou maitauina le mea o tupu i le sauaga o feusuaiga sa tupu i lea afafine. Na tiga ma aafia ai o latou lagona, ma talatalanoa ai i se auala e laveai ai le teine lenei.”
“Peitai e iai le tagata na faalogo i talanoaga a le aufagogota e faatatau i le sauaga i le latou nuu, ma avea ai ma se avefeau i le Toomaga.”
“O le pepe na ou fanaua i totonu o le Toomaga, ou te lei manao ai. Ua 19 nei o’u tausaga, ua ou matua, ae ou te le toe fia vaai i lo’u tamā. Afai ua falepuipui, ua fetaui mo ia. Ae mo a’u i le taimi nei, ua ou filemu i luga o lenei fogaeleele i lo’u aiga fou, o lo’u tina fou, ma le tele o o’u uso ma tuagane, ae o le Atua e fai ma o’u tamā.”
“O lo’u nofo ai i totonu o le pa uaea, talu mai le tolu tausaga talu ai, i le Campus of Hope, o se nofoaga sili lenei ona ou alofa iai. Ua ou a’oga, ua ou iloa kuka, alofa i isi tagata, ma ua amata ai nei ona faata’ita’i i le olaga e maua ai tupe mai galuega a o’u lava lima.”
“Ou te manao lava ia avea a’u ma se tagata ou te manao iai pe a ou matua, ma ia avea a’u ma teine lakapi, pe netipolo faapolofesa.”
