O loo faamaopoopo se faatasiga ua fuafua e faia a le sosaiete o mātua ma faiaoga faapea le asosi o tama ma teine tuai o le Kolisi o Avele, i le faamoemoe e ave se tuualalo i le Malo ina ia toe tatala le Kolisi mo le faaauauina o aoaoga a le fanau.
Ua atoa nei le vaiaso talu ona faia le faaiuga a le Kapeneta e tapunia lē tumau le kolisi e mafua i vevesi talu ai nei na aafia ai nisi o fanau a le kolisi o Avele ma fanau a le kolisi a le EFKS o Maluafou E ui ina iai se gaioiga ua faia nei mo le toe tatala o Avele peitai ua laumanuia ni molimau e lei faamaonia e faapea o le tapunia o le kolisi o se faaiuga e lē toe asiasi i ai se finagalo o le Kapeneta. O lona uiga o le mutaaga lea o le lumanai o Avele e lē toe tatalaina.
Ua faaalia e le taitai o le Malo le afioga i le Palemia, Auelua Fatialofa Lupesoliai Tuilaepa Sailele Malielegaoi, ua leva ona tatau ona mateia e le pulega o le kolisi ma le sosaiete a mātua ma faiaoga vai laina o ana saunoga na faia i se tasi o faatasiga i le tausaga ua mavae, sa ia faailoa ai, le nofo sauni o le Malo e faia se faaiuga pe afai o le a lē mafai ona vaoia vevesi o loo aliali mai. O le finagalo o le Palemia na folasia ina ua mae‘a ai foi se vevesi na aafia ai nisi o fanau a le Kolisi o Sagato Iosefo ma nisi o tama aoga o le kolisi o Avele. “Ua leva ona tatau ona mateia e le pulega o le kolisi aemaise o le sosaiete a mātua ma faiaoga a iu o a‘u faamatalaga, ae o le mea lea ua iloa nei ua matuā lē mafai e mātua ma faiaoga ona faia se fofo o vevesi nei”. O le vevesi na tulai mai i le Aso Lua, Aso Lulu ma le Aso Tofi o le vaiaso i tua atu le vaiaso faaiu o Aperila 2016, faapea le vevesi na toe aliali mai i le Aso Gafua o le vaiaso ua mavae atu nei i le va o nisi o fanau a le Kolisi o Avele ma le Kolisi a Maluafou, na vaaia ai e nisi sa iai tonu i le taimi o le vevesi le faaaogā e tamaiti o atigifagu, o laau faapea maa.
O se pasi la‘upasese e fealuai i le va o Apia ma le alu i Vailima o loo iai ma le kolisi o Avele na taei tioata ina ua tau‘ai e nisi o tama o le kolisi o Maluafou. Na tupu tonu le vevesi i luma o le kolisi o Maluafou. O le Aso Lua na tea nei na faia ai loa se leleiga ma sa tapunia ai le kolisi o Maluafou, ae o le aso foi lea na fono ai le Kapeneta ma faia ai le faaiuga e pei ona iai nei le tapunia o Avele. O le finagalo o le Palemia i le feiloaiga ma tusitala i le Aso Tofi ua mavae, na ia toe faailoa ai le tāua o le fuafuaga a le Malo e faatuina kolisi i nuu ma afioaga o itumalo o le atunuu i Savaii ma Upolu e agai i ai fanau.
O se fuafuaga tāua e lē toe tau omai ai i Apia, auā o le isi lea o faafitauli o le miomio faatasi o fanau ona tupu ai lea o mafaufauga leaga e aafia atu ai isi fanau. Ua faaalia foi e le Palemia, ua mafua ona tutupu mai nei faafitauli i fanau ona ua apo tele i tulafono mai fafo e pei ona ia faaalia o tulafono ma faiga a papalagi.
E faasino le finagalo o le Palemia i le lē toe sasaina aoai o fanau e faiaoga. Ua ave ai se fautuaga a le Malo i le Loia Sili ma lona ofisa e tusi se ata faataitai o se tulafono e mafai ai ona faatonutonu amio a fanau.
