Ua toe taliu manuia mai nei i fanua le tamaitai lalelei sa fai ma sui tauva o Samoa i le tauvaga i le sailiga o se Tausala o le Lalolagi, le Miss Samoa World, Latafale Alofa Auvaa. Ua lē o toe po se lilo i le faafofoga ma le silasila a soo se Samoa ma le lalolagi atoa i luga o alaata faasalalau, i le tulaga maualuga na oo i ai taumafaiga a lenei alo tamaitai o Samoa, ma lona auai atu ai i lenei tauvaga tele a le lalolagi.
A o lei faaiuina atoa lenei tauvaga sa faagasolo mai mo le masina atoa, e tele tusitusiga na faia i luga o fesootaiga faaonaponei e nisi o le latou lea matafaioi o le vailiili ma mataitu alumaga uma o gaioiga a tamaitai tauva taitoatasi sa auai, ma lafolafo i ai ni o latou manatu. O nei tagata o nisi lava e matuā masani lelei ma iai tomai e latou te taumateina ai ma le mautinoa, ni iuga e ono tulai mai i tamaitai eseese sa tauva.
Ma e manino mai ia latou tusitusiga uma ma matematega, sa telē se faateia na iai le lalolagi sa tulimataia lenei tauvaga, i le tulai mai o le Tausala a Samoa i le mataina o ona tomai sa faatino ai lona sao tauva i vaega eseese o le tauvaga.
E silia ma le 114 atunuu o le lalolagi sa auai atu o latou tamaitai tauva, ae mai lenei 114 sa iloga lava ona tulai ai le Tausala o Samoa i tulaga pito i luga i vaega sa faasolo i ai le tauvaga.
I le vaega o taaloga afeleti sa faatino, na tulaga 5 ai Latafale mai le to‘a 114 na tauva. O le vaega o taleni, na tulai mai foi Latafale i le tulaga 5. O le vaega o le Beauty with a Purpose, na tulaga 8 le Tausala o Samoa, e pei ona faaalia ai nisi o ana galuega fesoasoani sa faatino i Samoa, e pei o lona saunia ma foai atu ni tusi aoga mo le tele o aoga tulagalua i Upolu ma Savaii.
I le vaega o le People’s Choice Award na tulaga 24 ai Latafale, o le vaega o le siva a lona atunuu lea sa saasaa ai le tamaitai i lona laei faaleaganuu, le Dance of the World, na tulai mai ai Latafale i le vaega to‘a 8 pito i luga, ma o lea foi na filifilia ai e toe faaali lana siva Samoa i le po na faaiuina aloaia ai lenei tauvaga tele i le aai o Sanya i le malo tele o Saina.
O le ausia e Latafale o nei tulaga maualuluga i vaega eseese o le tauvaga o le Miss World, ua avea ai o ia se uluai tamaitai Samoa ua tauva i nei tauvaga, ua mafai ona ia ausia se tulaga, aemaise ai o ni tulaga sa latalata ai lava o ia i le manumalo.
O le tulai mai o le tamaitai o Latafale i lenei foi vaitau, aemaise le maualuga na oo i ai ona tulaga i le tauvaga, ua amata ai nei ona lagona le siuleo o le lototele i nisi foi alo tamaitai o le atunuu, e ono mafai foi e latou ona ofi atu i totonu ma finauina ni tulaga maualuluga i nei tauvaga faavaomalo, o se mea atonu sa mamao lava ma se mafaufau o ni alo tamaitai o Samoa e mafai ona latou ausia e ui lava sa taumafai e oo atu i ai i nisi o tausaga, ae sa lei iai se talitonuga e filo se tamaitai Samoa i tulaga ia na oo i ai taumafaiga a Latafale.
O le visiona lava lea na agai ma Latafale i lenei tauvaga, sa ia manao e ta‘u atu i le lalolagi, e lē na o foliga lalelei ma le tino momosi e iloa ai se tamaitai lalelei, ae o se tamaitai e iai le atamai o le mafaufau, e iai uiga alofa ma uiga faaletagata e fia fesoasoani i soo se tasi, ma o le ata lena o le tamaitai Samoa moni na manao lenei tamaitai talavou e faailoa atu i le lalolagi.
E lei manumalo Latafale i le pale o le Tausala o le Lalolagi, e pei ona ua pale ai nei le Tausala mai Sepania, le Miss Spain. Peitai i lagona uma ma loto o tagata Samoa ma isi foi tagata sa latou matauina ma maofa i le faatinoga o tomai o lenei tamaitai i le tauvaga, ua matuā faamalieina le maimoa ma le tapuaiga a lona atunuu, ina ua faaeaea e Latafale Samoa, i ana tu ma ana aganuu i le fia afe ma afe o tagata o atunuu eseese sa maimoa ai i lea tauvaga tele a le lalolagi.
O ai na iluilu talutalu e siva se tamaitai Samoa i luma o lenei aofia maualuga sa iai i lea afiafi? Ae ua mafai e le tamaitai o Latafale Alofa Auvaa! Ma ua faasisiva atu ai ma tausala uma o le tauvaga.
E momoli ai foi le faafetai tele i le afioga i le tamaitai faatonu o le Miss Samoa World, le Afioga Ulalemamae Teeva Matafai ma le latou komiti faafoe, o mātua o le tamaitai o Latafale, ma i latou uma sa faatinoina vaega eseese e lagolago malosi ai i le faamoemoe e pei ona alo atu i ai lenei alo tamaitai o Samoa.
O talotaloga, talosia e toe iai nisi Latafale se toatele i le lumanai e iai le lototele e finauina se tulaga o Samoa i nei tauvaga a le lalolagi.
Silasila i iuga o vaega eseese o le tauvaga o le Miss World 2015
Beauty with a Purpose: Indonesia
Top 10:
Guyana
Nepal
Nicaragua
Tanzania
Zimbabwe
Samoa
Russia
El Salvador
Ecuador
Talent: Guyana
2ndMalaysia
3rd Jamaica
4th Paraguay
5th Samoa
Sports: Namibia
2nd Seychelles
3rd Guam
4th Kazakhstan
5th Samoa
