E matautia faalogona o le mitamita ma le fiafia auā na vaaia foi le loimata maligi o le olioli ma le faafetai i le Atua, pe a faalogo atu ua lauina mai le suafa e mau tulaga i le laugatogi o le suesueina o le mafaufau i tauiviga faale-Tusi Paia.O le suega lenei a le Ekalesia Assembly of God (AOG) aoao o aulotu uma i totonu o Niu Sila, sa faataunuina i le Aso Toonai ma faaiuina ai loa i le tolaulaina o tulaga e ala i le laugatogi lea na faatumulia ai le maota o Samanipulepule i Magele i le afiafi o le Aso Sa.
E lua vaega o le faatulagaga o le suega a le Ekalesia aoao, o le Aoga Aso Sa ma le autalavou, ona faavasega lea i le Vaega A ma le Vaega B. E leai se aulotu na lei faamanuiaina i lea afiafi auā na amata le faatāuaina o tulaga mai le tulaga 20 o i latou na ausia togi faatulagaina o le suega.
O le Vaega la o le “B” a le Aoga Aso Sa na faamanuiaina ai alo ma fanau e toasefulu ma le lima i le tulaga muamua e aofia ai le tamaitai o Sefulu Paulo na latou ausia le 100 pasene o togi, faapena foi ma le vaega o le “A”, e toaiva na mauaina le tulaga muamua e aofia ai le alo tamaitai o le susuga i le faafeagaiga ia Pastor Tim Salamasina ma le faletua ia Fepulea‘i Lagi Toilolo mai i le aulotu AOG Papatoetoe Central, le tamaitai o Glory Fouvaa ma ē na latou ausia foi le 100 pasene o togi faatulagaina.
Na faapena foi le taupati a le autalavou auā na vaaia ai le faamalosiau e ala i tamā ma tina na faaaogāina lenei avanoa tāua e ala i le suesueina o le mafaufau e tusa ai ma sailiiliga ma le malamalama i le Tusi Paia.
O le veaga “A” o tupulaga na faamanuiaina ai foi le tamā ia Tufue Sa‘u mai i le aulotu i Mt Wellington ma na faaalia ai lona agaga fiafia tele e tusa ai ma lana taumafaiga i lenei foi tausaga.
Na faaalia le loto faafetai ma le fiafia o nisi o sui o aulotu mai alalafaga eseese sa maua faamanuiaga o lenei tausaga.
O se faamoemoe tāua tele ma le aogā lelei mo alo ma fanau o le Ekalesia ona o le isi lea auala ua fai ma taiala o le ola sogasogā o fanau ma tupulaga e sailiili ma suesue ai i le Tusi Paia mo lo latou lava iloa, aemaise o le tapasāina ai o le olaga faakerisiano ina ia mauaa le iloa ma le silafia e tusa ma le finagalo o le Atua i ona tagata.
O se sauniga matagofie tele na taitaiina e le susuga i le faifeau, Pastor Aliimuamua Poasa Auvele mai le aulotu a Mt Wellington aemaise o le faamalosi tāua ma le upu folafola na vaganaina e le susuga i le taitai aoao o le Ekalesia Samoan Assemblies of God i Aotearoa, le Susuga Pastor Motu Matia.
Na mae‘a le sauniga ma le laugatogi ona ta‘ape foi lea o tagata lolotu ma le fiafia ma le faafetai ona o faamanuiaga ua maua e tusa ma taumafaiga sa feagai ma sui uma mai aulotu taitasi, aemaise o le faalogoina ai o le leo o le toe faamalosi mo le suega o le tausaga fou.
