Lauga Faamavae Tauaaletoa Len Brown i tagata Samoa male Pasefika

Lauga faamavae ma faafetai ai Tauaaletoa Len Brown ile pitonuu o Otara ma Manukau ile lagolagoina o lona tulai mai ile tofi
Lauga faamavae ma faafetai ai Tauaaletoa Len Brown ile pitonuu o Otara ma Manukau ile lagolagoina o lona tulai mai ile tofi

Ole saunoaga faamavae ale afioga ia Tauaaletoa Len Brown ile taulaga faatau i Otara ile taeao ole Aso Toonai 27 o Aukuso, na moliauina ai ele toatele ole mamalu ole atunuu sa auai ma faafofoga i lana saunoaga le telē ole sao o lenei tamalii i totonu o tagata Pasefika.

E ui ose palagi ae ole loto ma le fatu o Tauaaletoa Len Brown o tagata Pasefika aemasie lava ia tatou Samoa. E tele ana galuega lelei sa faia mo tagata e pei o lona fesoasoani i nisi o tagata Pasefika sa nonofo faasolitulafono poo le overstayer a‘o avea ma taitaifono ole Labour Party i Otara, sa ia tu malosi e lagolago le fanua oloo fausia ai nei le maota o Samoa i Magele aemaise o fesoasoani oloo mauaina atu i Samoa mole malae taalo a fanau oloo fausia i Sogi.

Ole lauga faamavae ale afioga ia Tauaaletoa Len Brown i Otara ose polokalame sa tuufaatasia e taitaifono o Local Boards o itumalo taitasi e pei o Otara, Papatoetoe, ma Magele. Ole faamoemoe maualuga na faia ai lea polokalame ile taulaga faatau i Otara ona ole aai sa fofoa ai le olaga faapolokiki, seia oo ina avea o ia ma uluai pulenuu o le Super City. Ole pitonuu foi lea ua loa tausaga o tautua ai i lona tofi faipule faalotoifale o Otara ile pulega faaitumalo a Manukau City Council.

O lauga autu ole aso na saunoa iai le afioga ile Konesula o Samoa ia Faolotoi Reupena Pogi, sa fai ma sui ole malo o Samoa e momoli le agaga faafetai i lea tamalii ole atunuu e tusa ai ma lona alofa male lagolago malosi ia Samoa ma ana galuega faatino i totonu o Aukilani, e pei ona sapi ai le atunuu ile maota i Magele faapea le malae taalo ole fanau oloo fausia i Sogi.

Na ta‘ua foi ele afioga ile Konesula le tausaga 2012 na faaee ai le suafa matai Tauaaletoa ia Len Brown, ona o le tautua faamaoni ia Samoa. Na saunoa foi le susuga ia Alfred Filipaina e fai ma sui ole Council e momoli foi la latou faafetai e tusa ai ma le tele o tausaga o tautua Tauaaletoa Len Brown ile tofi pulenuu o Manukau aemaise le Super City o Aukilani.

Ole lauga ale afioga ile alii Faipule o Magele, Tofa Su‘a William Sio, na ia faafetai ai foi ile Pulenuu ile tele o tausaga o laua galulue faatasi a‘o avea Tauaaletoa Len Brown ma pulenuu i Manukau ae sui pulenuu ai Su‘a William Sio.

Ole lauga mulimuli ole aso na saunoa ai loa Tauaaletoa Len Brown i lona agaga faafetai ile mamalu ole atunuu e tusa ai male lagolago ia te ia a‘o tulai mai ile tofi pulenuu o Aukilani ile tele o tausaga, o lea ua faamavae ma malolo mai le tofi ona ua matua foi lona soifua, ae lē uma ai pea lona fia tautua ile atunuu.

Sa auai foi i lenei faamoemoe ma sui o puleganuu poo (local boards) mai le itu i Sisifo o Aukilani, faapea sui o tagata Initia male aoga a Southern Cross na saunia faafiafiaga e taualuga ai le polokalame o le aso ma faaiu ai loa ile iputi māmā auā le faamalositino.

E lē o toe mamao ona fai lea ole faiga filifiliga e sailia ai se isi sui fou ole tofi Pulenuu a Aukilani e suitulaga ia Tauaaletoa Len Brown.