La‘u i pikiapu tagata mama‘i i Manu‘a

Le taavale a le EMS oloo tautuaina le mamalu o le atunuu
Le taavale a le EMS oloo tautuaina le mamalu o le atunuu

Ua faaalia e ni isi o tagatanuu oloo aumau ma alala i Manu‘a ile vaiaso nei ile Samoa News lo latou le fiafia tele, ile leai lea o ni taavale a le EMS e tautuaina le mamalu o le atunuu oloo alala ma nonofo ile Itumalo ile taimi e gasegase, ma iu ai loa ina faaaoga Pikiapu a aiga e lau ai tagata gasegase ile falemai pe a tigaina.

Na faaalia e se tasi o Tina matua mai Fitiuta ile Samoa News ile vaiaso nei e faapea, o le vaiaso na tea nei na tulai mai ai se faalavelave ina ua faafuasei ona oso se gasegase a se tasi o Tama matua o le latou aiga, ma tau saili ai loa se taavale e momoli faanatinati ai o ia ile falemai ina ua vaaia tulaga tuga o lona gasegase.

“E silia ile 2 itula o tau saili se taavale a momoli ai lo matou Tama matua ile falemai i Tau, e vili atu ile falemai ae fai mai e le o i ai ni taavale EMS i Manua, oloo avatu i Tutuila e faaleleia vaega sa faaletonu, ua laki le taavale Piki-apu a le isi aiga o le nuu na mafai ona momoli lo matou Tama ile falemai, o le alofa foi o le Atua lea ua mafai ai ona toe maua lona malosi, ae ana tulai mai se faaletonu i luga o le auala ile taimi na momoli ai le Tama ile falemai ile Pikiapu, o ai e pau i ai lea faaletonu”, o le saunoaga lea a se Tina mai Manu‘a.

E toalua foi isi aiga mai Manu‘a sa talanoa mai ile Samoa News ile vaiaso nei, ma la faailoa mai le faafitauli lava lea e tasi, ile faaaoga lea o taavale tua e momoli ai fanau ile falemai mo togafitiga, ina ua saili atu ni taavale o le EMS mo se fesoasoani ae faailoa ane le tali, o taavale oloo aumai i Tutuila nei mo le faaleleia o vaega oloo faaletonu.

Na faamaonia mai e se tagata faigaluega a le Falemai i Tau, Manu‘a ile Samoa News ile vaiaso nei e faapea, o le tele lava o gasegase oloo auina atu ile falemai, oloo momoli atu i taavale a aiga. I luma o le maota o sui ile vaiaso nei, na laga ai e le afioga ile alii faipule mai le Itumalo o Manu‘a #1, afioga Vesi Talalelei Fautanu Jr le mataupu lenei, ma ia fesiligia ai le mafuaaga ua ala ai ona taofi umi i Fagaalu taavale falemai e lua na aumai i Manu‘a e faaleleia, ao lea ua tulai mai manaoga i tagata i Manu‘a na mafua ai ona faatau mai taavale falemai fou ia e lua mo Manu‘a.

“O taavale na aumai e siaki ma toe faaleleia ni isi o vaega ma le faamoemoe e tatau ona toe vave ave i Manu‘a, a‘o le tulaga lea ua ou maitauina ile taimi nei, o lea ua faaaoga e le falemai i Fagaalu taavale falemai e lua a Manu‘a e tautua ai tagata i Tutuila nei, ao le la oloo tigaina ma lau i Pikiapu tagata mamai i Manu‘a”, o le saunoaga lea a Vesi i luma o le maota o sui ile Aso Lua na tea nei.

Saunoa atili Vesi e faapea, o taavale falemai e lua na aumai i Manua, le Taavale #5 ma le Taavale #6, sa aumai ma le faamoemoega e toe vave faafoi pe a uma ona fai i ai galuega.

Na tulai le afioga ile alii faipule ia Meauta Mageo ma ia saunoa e faapea, oloo toatele foi le mamalu o le atunuu i Tutuila nei oloo latou fesiligia taavale falemai fou mo le EMS lea ua leva ona folafola e taunuu mai i se taimi lata mai, ao lenei lava ua afa le tausaga e lē o iai lava ni taavale ua taunuu.

Na ta‘ua e Vesi ile Samoa News ile taeao ananafi e faapea, ua maea ona fesootai atu tagata o lona itumalo e uiga ile mataupu i taavale falemai, atoa ai ma le faafitauli oloo tulai mai i Manu‘a ile taimi nei, ile faaaoga lea o taavale tua e lau ai gasegase ile falemai, ma oloo faagasolo pea fesootaiga mo le vave foiaina o lenei faafitauli.

E lei avanoa mo se talanoaga ile aso ananafi le Pule o le Vaega a le EMS, ona sa pisi o ia i se tasi o ana fonotaga taua, ae o le taeao nei lea ua faamoemoe e maua ai se avanoa mo se faatalatalanoaga ma le Samoa News, ma tuuina mai ai loa se faamatalaga e uiga i lenei mataupu.