Lapisi ele Palemia manatu o ia e iai le Ki ma le tatala o mea uma

 Ua saunoa le Palemia susuga Tuilaepa L Sailele Malielegaoi, e fai mea faalogo i faipule o lana vaega faaupufai ae le faia toatasi e ia se faaiuga ma se tonu ose mataupu
Ua saunoa le Palemia susuga Tuilaepa L Sailele Malielegaoi, e fai mea faalogo i faipule o lana vaega faaupufai ae le faia toatasi e ia se faaiuga ma se tonu ose mataupu

E iai lagona oloo faasala ese ile faaiuga ole filifiliga ose Ao ole Malo ma ole itu mautinoa e iai i latou sa mau pea le talitonuga e faaauau le tofi ele afioga Tupua Tamasese Efi, ae iai foi tagata sa lagona ua tatau ona faasee atu le afioga ile Tui Aana ona ua loa tausaga o seei ile tofi Sui Tofia ma ua oo tausaga o lona soifua ile 70.

Ole filifiliga ose Ao ole Malo oloo manino i aiaiga ole Faavae ole Malo Tutoatasi e mae’a loa le nofoaiga tuuoti sa seei ai Tupua Tamasese Meaole ma Malietoa Tanumafili II ona filifili loa lea ele Palemene se Ao ole Malo ile umi ole nofoaiga e nao le lima tausaga ae mafai lava ona toe faaauau mo se isi nofoaiga lima tausaga peafa ole filifiliga lea ale Palemene.

O aiaiga ia ole filifiliga ao lei ofi i upufai ole Malo ma le atunuu faiga faavaega faaupufai poo pati (political parties). Na filifilia le afioga ile Tui Atua ile Ao ole Malo i aiaiga sa iai ole Faavae e filifili ele Palemene peitai o lena filifiliga na taunuu ai ile lagolagoina ele itu sa agaia le Malo le filifiliga na tasi iai le HRPP ma sa nao ona faatu atu ele HRPP ole Tui Atua ae faaluaina ele itu agai.

Na oo ina mae’a le lima tausaga muamua o lana nofoaiga na toe faia foi le filifiliga i aiaiga lava ia ole faavae ma sa autasi foi le Palemene e toe faaauau le tofiga ele Tui Atua. Peitai ao lei mae’a le lima tausaga lona lua ole nofoaiga ale Tui Atua na faatu atu ele faigamalo ale HRPP se teuteuga ile Faavae ma ave ai le filifiliga ose Ao ole Malo ile pati faaupufai oloo iai le numela fulisia o nofoa ole Palemene poo le vaega faaupufai oloo pulea le Malo.

O aiaiga ia na faatoa faatino ina ua mae’a le lua nofoaiga ale Tui Atua e pei ona faia le filifiliga ale HRPP i sui na faatutu atu ole Tui Atua ma le afioga ile Tui Aana Tuimalealiifano Vaaletoa Sualauvi II. Ole taunuuga na manumalo palota na maua ele Tui Aana.

Ole filifiliga lea oloo mafua ai ni lagona ilitata o nisi ma ua fesiligia ai poo fea o iai le ava fatafatafa ma le tu ma le aga faasamoa oloo laulau vivilu ai. E lilifa ia lagona ile alofa ile Tui Atua ona o lo latou manatu sa tatau ona ave pea le faaaloalo ale Malo e faaauau ai le tofi seia oo ina afu lona soifua.

Fai mai nisi o lagona ole filifiliga na faia ele HRPP ua polokikia ai ma le tofiga ole Ao ole Malo ona e fai mea faalogo uma faipule ile mea e finagalo iai le taitai ole vaega faaupufai le afioga ile Palemia. I lagona na tuuina mai sa atagia ai le talitonuga ole Palemia sa unaia le suia ose Ao ole Malo.

Na saunoa le Palemia ile feiloaiga ma tusitala i lana faatalanoaga masani i luga ole leitio ale Malo ma ia faaalia ai o faiga ia ua iai Samoa ona ua iai vaega faaupufai, ma ole filifiliga foi lea e tatau ona saili ai se Ao ole Malo e filifili ele pati oloo iai le numela fulisia.

O lana saunoaga o faiga ia faatemokarasi oloo filifili ai Kovana sili o Niusila ma Ausetalia ma e leai se mea e ese ai ma Samoa. Ole finagalo foi ole alii palemia e sese manatu o nisi ua faaalia ai o ia e iai le ki ma le tatala o mea uma, ole mea lava e saunoa iai e tatau ona fai o lena lava le faaiuga.

E atagia ile finagalo ole taitai ole Malo oloo tuuaia e ia manatu o ia sa unaia sui faipule ole HRPP e faia le faaiuga ua taoto ai nei le tofiga ole Ao ole Malo. Faaalia e Tuilaepa e le faapea lana taitaiga ma o ia e faalogo i faipule ae o tagata oloo folasia ia lagona oi latou a oo ina oo atu ile pulega ole Malo e pule faafitafita. O lona uiga ose taitai faapea e pei ona saunoa Tuilaepa e toe liliu mai i tua ua leai ni o lana vaega.