E lei atoa se vaiaso talu ona alu lapataiga i le atunuu e faamamā nofoaga e fiafia iniseti o namu e nonofo ma tau tuufua ai, ae faailoa le maua o se tamaitai laitiiti 14 tausaga i auga o le gasegase o le Chikunguva lea e mafua i le vairusi e feaveai e namu. O ona auga o le fiva, tiga tino ma sooga o ponaivi ae o nisi foi auga e pata ai le tino.
O lea la ua uma le tasi ae ua faasolo ina faitau le lua ma le tolu ma sili atu gasegase ua masalomia, ma o auga uma lava ia ua maua ai. Ua faailao e le Faatonusili aoao o le mtagaluega o le soifua maloloina le alii fomai le susuga Leausa Dr Take Naseri, o le teineitiiti na muamua aafia ua lata i le fā vaiaso talu ona foi mai Amerika Samoa ma o lona iai i Tutuila e masalomia na aafia ai loa i le vairusi o le chikunguva. O loo tausia ma togafitia le teineititi ile vaega o loo taofia ai fanau i le maota gasegase o Tupua Tamasese Meaole i Motootua.
E oo mai i le faaiuga o le vaiaso ua tuanai atu nei ua faamaonia ua silia i le toatolu tagata ua aafia i le gasegase ma o se isi lea itu ua saga faamalosia ai lapataiga i lo tatou atunuu ia faamamā nofoaga e nonofo ai namu, ina ia mafai ona taofiofia ai le vave pipisi o le vairusi ona o lea e tapena le atunuu aemaise le Malo i le fono a atunuu laiti tauatiae o le lalolagi.
E lē o se mea lelei le alu o faasalalauga i tapenaga o lea fono tele, ae alu atu faatasi ai ma ni tala i le pipisi o lea faama‘i auā e ono mafai ona avea ma toatuga pe a alualu ai pea le faateteleina. O le mafuaga lea ua siitia ai puipuiga o le atunuu e pei ona fana soo se vaa o le sami e afea le atunuu faapea ma vaalele. Ua fanaina foi nisi o nofoaga faitele ma nofoaga o iai faleaoga ina ia faaitiitia le namu, ae o le faamoemoega autu lava o le matagaluega o tagata uma ia galulue faatasi.
O le vairusi o le chikunguva e lē tutusa lelei ma le vairusi o le dengue fever e feaveai uma e namu ma o o latou auga foi e leai se eseesega tele. O se tasi foi lea o tulaga e ao ai i o tatou tagata o loo foufou malaga i Samoa ona nofouta ma mataalia pe a taunuu i aiga mo ni tafaoga poo ni mataupu faaleaiga poo ni faalavelave. O fautuaga a le soifua maloloina, fai lelei ofu poo laei e ufiufi ai tino, faaaogā ta‘inamu e momoe ai ma faaasu namu e tutuli ai namu.
