O lea ua pasia le faitauga faalua o le Tulafono Taufaaofi mo le faatuina o se Fono Faatonutonu mo galuega faatusitala ma faasalalau a Samoa ma ua foi atu nei i se komiti a le Palemene mo le iloiloina ma toe foi ane ai i le maota fono i se taimi o i luma mo le auiliilina o ona vaega taitasi ma pasia i le faitauga lona tolu.
O se tulafono taufaaofi na folasia e le Palemia o ia foi na tuuina atu i le fono aoao le tulafono taufaaofi poo se pili, nisi o tāua ma aogā o lea tomai faapitoa ona o le logologoina ai o tagata i faamatalaga tāua ma aogā mo lo latou silafia. Peitai i le folasaga a le taitai o le Malo na ia fofola ai foi ma nisi o faaletonu na tulai mai i le galuega faatusitala i tausaga ua mavae.
O se nusipepa na molia i le taufaaleaga i se tasi o tamalii sa avea ma Palemia. Na toe faamanatu ai e le Palemia susuga Tuilaepa Lupesoliai Sailele Malielegaoi, taualumaga o le faamasinoga i le va o le Malo ma le nusipepa lea na faamaonia ai le sese o se lipoti faasino i se saunoaga a le Palemia i lea vaitau na faia i le Palemene.
Na faailoa foi e Tuilaepa nisi o faaletonu i le galuega faatusitala i le lē sa‘o ona lipotia o faamatalaga aemaise o le lē tausisia e tusitala o taiala o le faia o le amiotonu i le tutusa o avanoa e ave i tagata e aafia i ni mataupu e aumai ai ni o latou finagalo.
O le samala tu‘i simā na sasa ai e le Palemia le galuega faatusitala e ala i lana folasaga na ia ta‘utino ai foi i le tāua tele o le galuega lenei. E pei ona silafia o vaiaso taitasi e feiloai ai le Palemia ma tusitala mo le fesiligia i mataupu faatatau i le pulea o le Malo.
O se avanoa lea o le Malo e faailoa ai ni atinae ma ni taumafaiga o loo feagai ma le Malo ma e avanoa ai foi ona tali mai i ni fesili e faasino i ni mea ua leaga ma faaletonu ma ua aafia ai taitai o le Malo aemaise o le aufaigaluega a le Malo.
O loo manino ai foi i tali mai a le Palemia i ia feiloaiga le avanoa o loo saoloto ai le Malo e faaaogā ala o faasalalauga eseese e faailoa ai se finagalo o le Malo i ni mataupu e fesiligia ai. O loo maua foi e le Itu agai lea avanoa pe a valaau a latou feiloaiga ma tusitala.
O loo aiaia i le tulafono taufaaofi le tuuina atu e le Malo o se vaega tupe e lē o iloa pe fia le aofai e faatupe ai le faatuina ma le faagaioia o le Fono Faatonutonu. Peitai o se mataupu maaleale lea i lagona o nisi faipule o le Palemene ona o loo latou fesiligia le tutoatasi ai o galuega a le fono faatonutonu.
O le aafia foi o le Malo i le faatuina o se fono e ala i le tulafono faatonutonu sa fesiligia. I le tali a le Palemia na ia faailoa ai, e leai ma se aiaiga o le tulafono taufaaofi o faasino ai i se aafiaga o le Malo.
O le filifilia o sui o le fono faatonu e nafa ma sui o le sosaiete a tusitala le JAWS lea o le a faaveina foi i lalo o le tulafono lava lea e tasi. O seleni e tuuina atu e le Malo e faafoe ai e le aveesea ai le tutoatasi o le fono faatonutonu.
Saunoa Tuilaepa o tausaga ua mavae i nisi o fonotaga tetele faavaomalo sa talimalo ai tusitala i Samoa, sa savalia ai le Malo mo ni fesoasoani ma sa ave i ai. Peitai e lei aveesea ai le tutoatasi o tusitala i galuega faasalalau a nusipepa ma isi auala o faasalalauga i le faia o lipoti malolosi agai i le Palemia ma le kapeneta ma le Malo.
