O taimi lava faapenei ole tausaga ile mae‘a ai ole aso maliu ae ole tuuga foi lea o aoga ale fanau, e faagasolo ai le taamilosaga lenei ale South Pacific Club Challenge i totonu o Aukilani, ma o lenei taamilosaga e auai mai ai au voli a tama fanau a atunuu eseese ole Pasifika oloo aumau i totonu o Aukilani faapea foi ma au voli mai isi atunuu ole Pasifika.
Ile taamilosaga la o lenei tausaga na faaulu mai ai au e fitu i totonu ole taamilosaga lenei, ma sa vaavaai ai loa le komiti ise auala e ono faagasolo ai le taamilosaga ona o lea ua le paleni au ile Pool.
Peitai ole susuga ia Fuamatu Nuuvea mai le afioaga o Laulii ose tamafanau ua leva ona taalo foi i lenei taaloga ole voli ae ose sui foi ole komiti faafoe oloo faatinoina lenei faamoemoe, sa ia silasila mamao ile lumanai o fanau ile taaloga lenei ole voli, ae ua ia maitauina foi e iai fanau aoga oloo iai le taleni ma le meaalofa ile faatinoina ole taaloga lenei.
O lea na ia aoaoina mai ai fanau aoga e toavalu mai le aoga a De La Sale e toafa ona sui, o sui e toatolu ole aoga a Kelston ma le tamaititi aoga mai le Marcellin College faatasi ai ma le susuga ia Faaetete ma Patrick oni tagata ua lauiloa i lenei taaloga e fai ai se au e faalava ai au ole taamilosaga.
Aluai, aluai ua toe tasi le vaiaso amata le taamilosaga ae maua mai le tala o lea ua auai mai le au mai Tahiti ma ua foliga mai ai ua 9 au o lea ua auai ile faalagamaea lenei.
Ile finagalo ole susuga ia Fuamatu Nuuvea, e lei faia se au ina ia finau ile manumalo ae ole agaga maualuga i lona loto ina ua faamaopopo le au a tamaiti aoga, e aoga le faataaalo o fanau aoga ile taamilosaga lenei e ono ausia ai e fanau se tulaga maualuga e finauina ai au tetele ile lumanai ole latou taleni ae faapea foi ia masani le latou taalo i taamilosaga tetele faapenei.
O fanau aoga nei, e toalua mai ile vasega 13, toafa mai ile vasega 12 ma le taolua ile vasega 11, e ui ile laiti o tamaiti aemaise ole taimi muamua lenei ua taaalo ai i taamilosaga tetele faapenei ae ua matua tauga lava le faafiafiaina o latou matua ile faatinoina ole taaloga.
Ua faaigoaina le au lenei ile Young Lions ma e fa au sa auai ile latou Pool faatasi ai ma le Young Lions ona lima lea.
Ile faagasoloina ole taamilosaga ale Pool lenei, na faateia ai le susuga ile faiaoga ia Fuamatu Nuuvea faapea matua o nei fanau ile mataina ma le mataalia ole taaalo a nei fanau ile sailia ose latou avanoa ile lua au pito i luga ole Pool, e ono ofi atu ile quarter final.
Mae‘a le taaloga muamua ale young Lions na latou faamoamoaina ai le au numera tasi poo le A mai Tonga, na manumalo foi ile au ale South Auckland ose tasi o au ua leva foi i totonu ole taamilosaga, ae sa faapea foi ona manumalo ile au ale Auckland Tonga poo le au a tama fanau a Tonga i totonu o Aukilani.
Ole latou taaloga mulimuli ile Pool na latou sailia ai ma le au numera tasi mai Thiti le tulaga muamua ma le tulaga lua ile Pool, ma sa le manuia le latou taaloga ma see mai ai ile tulagalua, ae ua mautinoa ai lava o lea ua ofi atu ile sailia ole ipu autu.
Ole sao mai ai ole Young Lions i au malolosi ole Pool na faateia ai lagona ole toatele ile tele ole taleni oloo i alo ma fanau aoga o Samoa, ae ole fiafiaga sili foi lea i matua ma momoli ai le latou agaga faafetai ile susuga ia Fuamatu Nuuvea ile finau ma le silasila mamao ile lumanai o fanau talavou aemaise ai ole fafaguina ole taleni oloo iai latou.
Ole quarter final na saili ai loa ele Young Lions ma le Uso mo Uso se au e alu iluga ole semi final ose tasi foi o au a tama fanau Samoa i Aukilani, ma sa malolo ai loa le Young Lions.
Na see ifo i lalo ma taalo ma le isi au a Tonga ua faaiogina ole Apai ma manumalo ai, ma sa faatalitali ai loa ise au e saili ai le tulaga lima ma le tulaga ono, aepeitai sa fai le faaiuga ale komiti faafoe e tutusa ile tulaga lima le Young Lions ma le Players ona ua leai se taimi e faagasolo ai se latou taaloga.
Ile iuga ole taamilosaga na sola ai le au a tamaiti Samoa ole Uso mo Uso ma le tulaga muamua, tulaga lua le au mai Tahiti ma le tulaga tolu ole au mai Tonga ua faaiogina ole Eagles.
Saunoa le susuga ia Fuamatu Nuuvea, ose tasi o avanoa e maua e tamaiti aoga nei o avanoa mai i kalapu e manano i tamaiti taaalo, ma ose auala mase avanoa e ono faalautele ai le taleni ma le meaalofa aua so latou lumanai manuia, aua ua toatele nisi o fanau ua manuia ona o taaloga.
