Ua tele atinae ma pisinisi ua galulue ma faatinoina e o tatou tagata auā lava le lumanai manuia o aiga, ae o se tasi lea atinae o loo maitauina le alualu pea i luma o le faaaogāina o le taleni ma le meaalofa ua tuuina mai e le Atua o le pese. Toatele i latou ua avea le pese ma galuega ua manuia ai aiga ma fanau.
Ae o se tasi o tamalii o le atunuu ia Tuaopepe Lafaele mai le afioaga o Gagaifo Lefaga ua ia faatinoina lenei foi atinae o le faili i totonu o Samoa. Ae o loo ia faatuina foi se Taxi Stand i Talimatau. O loo alala i Niu Sila ae fai ma malaga i Samoa auā lava le faaleleia o ana atinae.
O le lagona o Tuaopepe Lafaele, ua leva ona mafaufau i sana faili auā o le tele o faaipoipoga ma valaaulia e faaaogāina ai ana taavale e fesiligia e tagata se faili, auā e lē matagofie ona faaaogā ni DJ i ni faaipoipoga, siva poo ni aso fanau, o le mafuaga lena ua ia taumafai ai loa i se faili.
Ma o lona tupuaga foi e mai le aiga sa tata i faili e faaaogā ai mekulini. Sa iai lana DJ e feaveai solo i ni valaaulia ae o lea ua see i le isi sitepu o le pisinisi ona e fiafia atu tagata i pese live nai lo le DJ.
O le masina o Aperila na tatala aloaia ai loa i le afioaga o Gagaifo i Lefaga le faili faatasi ai ma le CD ua faaigoina o le Noel Band Volume 1; o le aso foi lea na faatau ai i tua le CD. E sefulu pese o loo tusia i totonu, ma o nei pese uma na tusia e le susuga ia Tuaopepe Lafaele ma le susuga ia Mautoatasi Asuao.
O le maota o Tuopepe i uta i Talimatau na pueina ai le CD ma tuufaatasia ai i le tasi le masina. O nisi o alo pepese iloga o le atunuu o loo faaaogāina i lenei faili, susuga ia Mautoatasi Asuao, Michael Mamaia, ma le susuga ia Don Nise o se tasi sa iloga foi i mea tau DJ i Ausetalia.
O le atalii o Tuaopepe ia Noel o loo faaigoa ai lana Taxi Stand ma lana Faili. Ua faatau nei i tua i nisi o faleoloa i Aukilani le Volume 1, ae ua tapena nei foi i le Volume 2. Faaalia le agaga fiafia o Tuaopepe Lafaele i lea foi atinae ma ua ia iloa ai le pisi ma le tele o valaaulia ua maua i Samoa i faaipoipoga, aso fanau, reunion ma siva.
