LAGOMAU BABY MONA…Ae pe o ai ea ona matua?

Afioga Patele Michael Enderman a’o molimoli atu le tino maliu o Baby Mona i lona tuugamau
Afioga Patele Michael Enderman a’o molimoli atu le tino maliu o Baby Mona i lona tuugamau

E oo mai ile taimi na tuuina ai le tino maliu o Baby Mona ile fanua tanu i Magele ile taeao ole Aso Toonai ua mavae 30 o Setema, e lei maua lava i suesuega ma sailiiliga a leoleo lē e ona tonu le pepe lea sa lafoai ile paka o Mona Park i Magele ile aso 24 o Novema ile tausaga ua mavae 2016. Pau le faamatalaga sa maua i lea taimi e na’o le ie sa aui ai le tino ole pepe oloo tusia ai le igoa Samoa.

A’o fai sueusega ma sailiiliga a leoleo i lea mataupu sa tatala ai le avanoa ile lautele ole atunuu pe ono mafai ai ona tulai atu le tina e ona le pepe poo se isi foi ole aiga e faailoa atu o latou e ona le meaalofa lea mai le Atua. Ile taimi lava lea a’o fai ai sailiiiliga a leoleo na tuuina atu ai ma le tuualalo ale afioga ile faipule o Magele ia Aupito Su’a William Sio ile ofisa o leoleo, afai ae le maua le tagata poo se tasi ole aiga e ona lea alualutoto, ona logo mai lea o ia ae se’i fai iai se galuega alofa ile oloa tāua ale Atua.

Peitai ua alua’i alua’i sailiga ma suesuega ale ofisa o leoleo i lea mataupu, ua siliga i tali i seu se tali mai ole lautele ole atunuu, ma o lea sa toe logo mai ai loa ele ofisa o leoleo le afioga ile faipule o Magele ia Aupito ua le mafai lava ona maua atu se tali ole tina ma le aiga e ona le pepe.

O lea la sa galulue ai loa le afioga ile faipule ia Aupito Su’a W Sio ma le Local Board a Otahuhu ma Magele e oloo taitaifono ai le tamaitai ia Lemauga Lydia Sosene ile faapolokalameina ole aso e teuina ai le tino maliu o Mona. Talu ai ona e fanau mai le pepe e e lei maua sona igoa ma o lea sa faaigoa ai loa ia Mona ile igoa ole paka lea sa lafoai ai lona tino e lona tina.

Ile toe sauniga o Baby Mona ile fanua tanu i Magele (Mangere Lawn Cemetery) na taitaiina lea ele afioga ia Father Michael Endermann, faapea le aufaipese ale Divine Mercy Malaeola sa lagiina viiga ole Atua. Na tumutumu le fanua tanu i Magele lea e silia ile selau tagata sa auai, i sui o Local Boards, o tagata eseeese ole Pasifika e aofia ai Samoa, o palalagi faapea tagata mai isi atunuu. Sa faapea foi ona auai nisi o susuga i faafeagaiga Samoa ma nisi o faafeagaiga papalagi. Ole tumutumu ai o lea sauniga na faailoa ai le mamalu ma le alofagia o lea alualutoto ele lautele ole atunuu.

Maea ona tuuina lona tino maliu ile eleele Baby Mona
Maea ona tuuina lona tino maliu ile eleele Baby Mona

Saunoa le afioga ile faipule ia Aupito Su’a William Sio ole saunoaga autu lea ole aso, na ia tuu a lalo ai ma faamalosi ile atunuu ua le gata ia Samoa ae ole Pasifika atoa, e moomia e mātua ona lagolago i fanau pe a oo ina tutupu mai faafitauli faapenei. E le gata i lea poo ai lava fanau teine oloo tutupu ai mea faapea ia latou mautinoa oloo iai lava auaunaga e mafai ona valaau iai mo se fesoasoani mo i latou, e ala lea ile faia o faatalatalanoaga faalilolilo e aunoa ma le silafia e nisi, ma atonu foi e maua ai nisi manatu lelei nai lo le oo ile tulaga lea ole olaga.

Faamamafa lava ele faipule le loto alofa, aua ne’i vaai loa ua tutupu faafitauli ile isi tagata ona vave lea ole tusitusilima ae e tatau lava ona maua le galulue faatasi ma fesoasoani le tasi ile tasi.

Ole lipoti foi sa tuuina mai ele ofisa o leoleo ina ua mae’a suesuega i lenei tamaititi, ole tina ole pepe oloo fia maua e ia se fesoasoani ile taimi nei, e ala ise faatalatalanoaga ma ia, ae afai la ae lē tulai mai le tina ma faailoa lona manaomia ose fesoasoani o lona uiga ole a avea ma mea e taotaomia ai lona ia soifua maloloina lelei ile lumanai.

Na mae’a le sauniga o Baby Mona ona faaiu lea ile iputi na saunia ele Local Board a Otahuhu ma Magele mo le mamalu ole atunuu.

E tele ni itu lelei na molimau ma foai ai le tele o tagata ia Baby Mona i lona maliu, o nisi sa latou foaiina le pusa maliu, o lona fanua tanu i Magele na foai foi, ole maa, faatasi ai ma teu fugalaau sa teuina ai lona fanua, o nei vaega uma sa foaiina e nei Samaria agalelei e lei finagalo e faailoa o latou suafa.

Ole fale maliu ole Tipene Funeral Services na latou ofoina le tuuina iai o lona tino, faatasi ai ma le tele o tagata na taumafai e foaiina tupe ae sa tetee ele faipule ona ua silasila i latou ua lava ma totoe tapenaga e pei ona iai ile aso o Mona.

Ole saunoga faafetai ale afioga ile faipule ia Aupito Su’a William Sio na ia faafetai ai ile mamalu ole atunuu aemaise i latou uma sa foai ma le loto malie ma le loto alofa mea uma e ala ile sauniga o Baby Mona ua maualuga ma matagofie ai lona toe sauniga e pei ona iai le taeao ole Aso Toonai.

Sa faafetai foi le faipule ile Local Board a Otahuhu ma Magele sa latou tuufaatasia lenei faamoemoe.