Lagolago tama IRPA i le manu‘a o latou uso o le Manu Samoa

O le mataupu sa amata i le va o tama o le Manu Samoa ma le latou Iuni faatina le Samoa Rugby Union, ae ua avea le faaumiumi ona fetosoa‘i pea lenei mataupu ma le lei iai o se tali ma‘oti e faamalieina ai mataupu sa laga atu i le tusi a tama taaalo, ua amata ai nei ona pipii mai i ai isi o latou uso taaalo i lenei faagatama o le lakapi e faailoa lo latou lagolago i le faagaulemalie o tama o le Manu Samoa.

O le IRPA (International Rugby Players Association) o se faalapotopotoga e faia a‘e i asosi a tama taaalo lakapi faapolofesa mai atunuu e pei o Aferika, Egelani, Ausetalia, Sikotilani, Aialani, Uelese, Falani, Anitenitina, ma Niu Sila.

O le asosi lenei na fautuaina e le loia a le IRB tama o le Manu Samoa, e tatau ona agai muamua i ai le latou mataupu, ona faaoo atu ai lea e le IRPA. O le asosi foi lenei ua unaia atili le mataupu i le IRB, ma faasolo atu ai lava ina aafia le IRB agai atu i le SRU poo le Iuni Lakapi a Samoa, e faatalanoa ai se fofo i le mataupu o loo laga atu i le faaseā a nisi o sui matutua o le ‘au a le atunuu.

E pei ona silasila i ai i luga o upega tafailagi ma auala o fesootaiga vavave faaonaponei, o loo faaali solo ai ata o nisi o tama taaalo mai ‘au a isi atunuu tetele o le lakapi, e iai Niu Sila, Ausetalia, Aialani, Amerika, Falani, Italia, ua taufai faailoa mai lo latou tutufaatasi pe autasi e lagolago le mataupu a o latou uso taaalo Samoa.

Sa faia foi e leitio faasalalau ni faatalanoaga ma nisi o sui muamua o le Manu Samoa, e pei o le afioga Aumua Too Vaega, ma na matuā saunoa manino ai lava lena foi sui tuai o le Manu Samoa, o le mataupu lea ua faalua nei ona laga e tama, e lē o se mataupu fou, sa iai foi i o latou vaitaimi ae sa olo lava le fua ma mafaufau i le tapuaiga a Samoa, atonu o iinā na taofiofi mai ai latou i le faaali atu o ni o latou lagona lē fiafia sa iai, aemaise lava i le auala sa faagaoioi ai mea i totonu o le pulega a le Iuni lakapi.
Saunoa Too, o lona ia faanoanoaaga, ona o nisi o i latou o la ua saofafai mai nei i komiti faafoe ma le pulega a le Iuni lakapi, sa tama taaalo foi latou ma latou iloa lelei le uiga o le mea lea e tagi atu ai tama, ae pagā lea, ua leai lava se minoi mai e fesoasoani pe faaleleia nei faafitauli ua leva tele ona iai.

E eseese lagona o tama tuai o le Manu Samoa. O nisi tama, e lē o fiafia i le gaioiga a tama o le ‘au lea ua fai nei. E manatu latou e pei ona faaali i luga o upega tafailagi se finagalo o le alo o Samoa o Feleti Tuilagi, e lē fiafia ona e peiseai ua faatāua e tama tupe ae lē faatāua le tautua mo le atunuu aemaise le tapuaiga a Samoa. O le atugaluga foi o na sui, o lenei ua matamata mai nei le lalolagi ma iloa ai o loo fevaevaeai le lakapi a Samoa, talu ai le faaaliali atu i fafo o nei ituaiga o mataupu.
Ae ina ua faatalanoa e le sui faasalalau o le Radio Samoa, fetalaiga ia Seumanu Francis Ioane, se tasi o alii faasalalau iloga i Samoa, aemaise o se tasi e masani ona malaga faatasi ma le Manu Samoa auā le faasalalauina mai o ana taaloga i isi atunuu, le susuga Sioeli Taulealeausumai Alofaifo, na matuā maioio lelei le faataatia mai e Sioeli o vala nei o loo lē malilie ai tama.

Saunoa Sioeli, o le mea faigata lea ua iai nei, ua matuā ave lava le faamamafa o le faaseā a le komiti i le tulaga faapea ua manao tupe tama, auā o se tasi o mea sa ta‘ua i le latou tusi. O lea la ua tele ina faitioina tama faapea ua na o le mafaufau e sii alauni ae semanu e leai ni tupe a le Iuni e fai ai ni totogi tetele. Peitai o le tupe i totogi ua na o se tasi o mataupu, ae o loo iai isi mataupu tāua ia ua nanā ifo i lalo, lea e finau atu ai tama o mataupu sili na ona ogaoga i o latou manatu e manaomia ona sui pe faasa‘o.
O mataupu e aofia ai le lē lelei o fesootaiga a le tama taaalo ma i latou o i luga o le tumutumu o le Iuni lakapi. Le lē fiafia o tama i le toe aiāina e le Komiti Faafoe o le filifiliga ua uma ona fai e le alii faiaoga ma le pulega a le ‘au, ae ona o nisi nei o tama sa faaseā muamua foi, e pei o le susuga Mahonri Schwalger. Le saisaitia o tama taaalo e faaali ni o latou lagona i ni mea e lē fiafia ai, ona o le matata‘u ina ne‘i avea le tautatala ma itu e faasiugutua ai ma lē toe filifilia ai i le ‘au, e pei o le iuga ua oo nei i ai le Kapeteni muamua o le ‘au, ia Mahonri.

E pei la ona saunoa Sioeli, o le mea e faanoanoa ai lena mea na fai e le Komiti Faafoe, auā o lea ua filifili e faiaoga le ‘au e ono manumalo ai ia latou taaloga, ae ua toe sui; afai la e faia‘ina le Manu Samoa, e muamua lava tilotilo ma tuua‘ia le faiaoga, ae semanū o lea e lei taaalo uma tama na manao le faiaoga e maua ai lana ‘au e manumalo. O polokiki na o loo faataamilo nei i totonu o le Iuni lakapi, ua tele ina oia ai lagona fiafia o tama.
Sa taumate lava pe oo se taaloga i le va o le Manu Samoa ma Egelani, ae na iu ina masuiga mālie lagona o tama, ina ua uma ni fetalanoaiga ma sui o le IRB ma fautuaina ai ina ia faaauau pea le taaloga e tusa ai o faasologa ua uma ona fai, auā semanū e ono afaina ai se avanoa o Samoa mo le taamilosaga o le Ipu o le lalolagi, aemaise foi le taaloga tāua lea o loo tapena atu i ai mo le tausaga fou ma le All Blacks.

O le malilie o tama, ona ua latou iloa o lea ua faalaa ifo le IRB aemaise foi le asosi o tama taaalo faavaomalo le IRPA e fesoasoani i le latou mataupu i le va ma le Iuni lakapi a Samoa. I nisi o tusitusiga o loo ta‘ua ai e le taitaifono o le IRB, Bernard Lapasset, e tatau lava ona lagonaina leo o nei tama ma le mataupu o loo finau ai, e ui i ni lafoga a le taitaifono sa faatusa ai e pei o ni tamaiti i le mea ua latou faia, ae talitonu le taitaifono o le IRB, e tāua mataupu o loo finau ai tama.

Ta‘ua i nisi o lipoti, e faalua ona talo ni fonotaga a sui o le IRB, le IRPA ma nisi o tama taaalo ma sa tatau foi ona iai ma se sui o le SRU, ae lei auai atu se tasi i na uma fonotaga e lua a o loma ai le taaloga a le Manu Samoa ma Egelani. O le mafuaaga sa ta‘ua e faapea ua fai sina fesea‘i o aso ma taimi, o se mafuaaga o loo lē talitonuina gofie e nisi.

Ui lava i lea, o loo faatalia nei poo fea a agai i ai lenei mataupu i le va o tama o le Manu Samoa ma le Iuni lakapi a Samoa. E talotalo ma faamoemoe tagata uma o loo mulimulitai i le Manu Samoa ma ana taaloga, ina ia vave ona maua se fofo toafilemu o lenei vevesi, ina ia vave ai foi ona toe faafoi le taaalo a le Manu i le malosi e pei ona sa masani ai, auā o le mea moni lava, ua telē le suiga ua iai le ‘au i lenei vaitaimi, aemaise lava le toilalo i nisi o ‘au sa lē masani ai ona manumalo ia Samoa.

O le lakapi o loo tele ina faaigoa o le taua o mafaufauga; lona uiga o le taaloga e matuā manaomia ona avatu uma i ai le mafaufau mataalia ma le mafaufau toto‘a o le tama taaalo. Ae afai e tele nisi faafitauli o loo lavelavea ma mafatia ai lagona ma mafaufau o tama taaalo, e faapena lava ona avatu i totonu i le malae i le taimi e taalo ai, ma lē 100 pasene ai le faatinoga o lana taalo. Ona lē sa‘o atoatoa ai lea o upu o lana Siva Tau, “Ua ou sau nei ma le mea atoa, o lo‘u malosi ua atoatoa.”
.