“O le matou mau, ua oo mai i suli o Natuitasina le faasologa o le Nofo, ae ua matou lagolagoina le faaau o le Nofo a Papalii Moli e tausi ai le filemu o le aiga ma ia avea matou ma faataitaiga lelei”…Papalii Ioane Afele
O le masina fou o Iulai 2015 e toe feiloai ai suli e toatolu o le suafa maualuga o le Malietoa i le maota i Poutoa i Sapapalii, e faamautu se finagalo autasi o le aiga i se tasi e tausia le aiga ma faaee i ai le Suafa Tupu o le atunuu o le Malietoa.
Na maua se fesootaiga ma se tasi o suli o Malietoa Natuitasina le susuga Papalii Ioane Afele ma ia faailoa mai ai lea fuafuaga. “E feiloai muamua suli o Talavou i le aso 11 o Iulai ona iloa ai lea o se aso o le masina fou lava e toe feiloai ai lo matou aiga uma i suli e toatolu”. O le saunoaga mai lea a Papalii Ioane ma lana faamatalaga, ua lagolagoina e le latou itu i suli o Natuitasina le faaau o le nofo a le susuga Papalii Moli”.
O le matou mau, ua oo mai i suli o Natuitasina le faasologa o le Nofo, ae ua matou lagolagoina le faaau o le Nofo a Papalii Moli e tausia ai le filemu o le aiga, ma ia avea matou ma faataitaiga lelei”.
Na faaalia foi e Papalii Ioane, na faateia suli o Talavou ina ua oo atu mo le latou feiloaiga lona valu na faia i Sapapalii i le Aso Toonai 13 o Iuni 2015, ua iai le finagalo fulisia o le latou itu e lafo le lagolago ia Papalii Moli. O le mafuaaga lea na tatalo atu ai suli o Talavou se‘i taatia atu se‘i toe feiloai o latou suli ona maua ai lea o se isi faaaliga.
O le valu o feiloaiga ua faia e suli e tolu e saili ai se Nofo i le suafa Malietoa, o le pine faamau lea o le talitonuga e lē faigofie ona maua se finagalo autasi o aiga pe a filifilia se Nofo e tausia le aiga.
O loo iai le fuafuaga a suli e tolu afai ae maua se autasiga ma maopoopo le lagolagoina o le faaau o le Nofo a Papalii Moli, o le a faia loa ni aiaiga e saini lima uma ai suli ma tuuina atu i le faamasinoga o Fanua ma Suafa.
O le faamoemoe ia lima taitaiina ai le aiga i le lumanai i le filifiliga o se isi Nofo, ma taofia ai le umi ma le tele o tausaga o soalaupule ma saili se finagalo malilie o suli, ma taofia ai le toe oo i le faamasinoga e tofi mai ai se Nofo.
O le tausaga e 2007 na tuumalo ai le susuga Malietoa Tanumafili II, o le nofo mai suli o Malietoa Moli. O ia foi sa avea ma se tasi o Ao Soofaatasi o le Malo o Samoa faatasi ma le afioga i le Tamaaiga Tupua Tamasese Meaole.
