E toalima ni alo o le Pasefika ua faamanuiaina i ni sikolasipi e pei ona aloaia ai o latou faailoga i se sauniga na faia i Kalaiesetete, i tomai i galuega tau le soifua maloloina.
E faaopoopo atu i latou nei i le isi to‘a 27 o fanau a le Pasefika, sa faapea foi ona latou maua lenei lava faamanuiaga e tauala mai le fesoasoani a le vaega a le Pegasus Health Pacific Health Scholarships, lea sa faatupeina ai a latou suesuega i mataupu tau vailaau ma fualaau mo le soifua maloloina, ma isi tomai e pei o le tausi soifua; o se polokalame na amata mai le tausaga e 2005.
O i latou e toalima ua toe maua foi lena faamanuiaga tau sikolasipi i lenei tausaga 2012, e iai Toma Petelo, Kavitesh Karun Deo, Jamie Hunter Ioane, Rhys Fa‘avae, ma Ruby Alloway.
O Toma Petelo o se alo o Samoa na soifua ane lava i le tele o lona olaga i Samoa. O Toma e toavalu ona alo, ma o lea o loo faagasolo lona tausaga mulimuli i le sailia o lona tusipasi i suesuega tau le ‘ava malosi ma isi suesuega tau vailaau ma fualaau (Bachelor of Alcohol and Other Drug Studies).
E naunau tele Toma i lenei mataupu ona e talafeauga lelei ma lana galuega o loo galue ai nei, o se faufautua mo i latou ua matuā pagatia ai lenei lava faafitauli o le ‘ava malosi ma fualaau faasāina (Addiction Counsellor for CareNZ Alcohol and Drug Service).
O le alii talavou o Jamie Hunter Ioane, na soifua ane i Kalaiesetete mai ona tupuaga Samoa, ma o lona tausaga ono lenei o loo aoga ai le Iunivesite a Aukilani. O tuaa o Jamie, o nisi sa tele ina galulue ma ofo fua atu o la taimi e fesoasoani i tagata o le komiuniti.
O inā na telē ai le silafia o Jamie i manaoga ma atugaluga o loo feagai ma tagata Pasefika, o le ala foi lea o lona naunau e faalautele ana suesuega i tomai tau vailaau ma fualaau mo le soifua maloloina.
O le isi alo o Samoa sa iai i lenei toalima mo avanoa sikolasipi a le Pegasus, o le alii o Rhys Fa‘avae, e sau foi mai Samoa, ma o le lona lima lenei o ona tausaga i ana aoaoga o loo ave ai foi lana mataupu tau i vailaau ma fualaau mo le soifua maloloina.
O le tuaa tamā o Rhys o se tasi foi e iloga i ana galuega mo le komiuniti, lea foi e ola ai Rhys ma lona faanaunauga ia telē sona tomai e fesoasoani atu ai i ona tagata Pasefika aemaise Samoa, ia faaleleia nisi o faaletonu tau le soifua maloloina o loo tele ina aafia ai, aemaise foi le gasegase o le fatu.
O le isi toalua na toalima i ai i latou ua maua sikolasipi, o le tamaitai o Ruby Alloway, o se tamaitai na soifua ane i Kalaiesetete mai tupuaga Niue, ma Kavitesh Karun Deo, o se alii mai tupuaga Fiti. Na saunoa le taitaifono o le Pegasus, Dr Martin Seers, o nei faamanuiaga sikolasipi, o se vaega o polokalame a le Pegasus ina ia matuā fesoasoani atu ai i tagata Pasefika ia faaleleia lo latou soifua maloloina.
