Lagolago le Tianas Pacific Flavaz i Sui tauva mo le Miss Samoa Ausetalia

O le auaunaga a le Tianas Pacific Flavaz ua amata ona lauiloa ma tāua i le mamalu ma le paia o Samoa o afifio i le aai o Melepone, o lana tautua e ala i taumafa ma kuka felanulanuai ma le manogi mo le fofoga taumafa o le atunuu, ua iloa lautele ai nei.
Peitai o lea ua toe faaopoopo ma le isi tautua a le tamaitai pule ia Ruby McCarthy mo le atunuu.
O nai masina ua tuanai atu na faatoa‘i mai ai se talosaga mai le aai o Perisipeni a le komiti o faafoeina le Miss Samoa Ausetalia, pe mafai ona faatautai se faamoemoe mo ni sui tauva mai Melepone, ona amata faalauiloa lea ma faataunuu ai le sailiina o ni alo tamaitai e agavaa ma fia tauva.
Saunoa Ruby e lē o se savaliga na faigofie, ae na faamoemoe lava i le fesoasoani a le silisili ese, faatasi ma le lagolago a le atunuu. O le po o le Aso Toonai na tuanai atu na faatinoina ai se siva a le Tianas Pacific Flavaz e saili seleni mo le tautua a le faleaiga, ma o le uluai taimi foi lea na silasila ai le paia ma le mamalu o Samoa i alo tamaitai e toalua lea ua sauni atu e fai ma sui o Melepone mo le tauvaga i le Aso Toonai o lumanai i le aai o Perisipeni.
Na faatumulia le malu na fai ai le faamoemoe o le Tianas, na maua le avanoa faapitoa na faalauiloa ai sui o Melepone, lea na maitauina le tutulai faaaloalo o le paia o le atunuu ma faaalia lo latou agaga lagolagosua ma patipatia le taumafaiga a nai nei alo, ona faagasolo ai lea o a la saasaaga (siva) Samoa na faaalia le lagolago o le atunuu i le maau ma le milomilosia i le aao mafola, o seleni uma na maua ia la siva Samoa.
Na toe tauaao atu e Ruby ia i laua auā le tapenaga ma le sauni atu mo Perisipeni. Momoli ai le agaga faamalo ma le faafetai i le tamaitai pule ma le auaunaga a le Tianas ona o lo latou agaga fesoasoani mo le atunuu.
Saunoa Ruby, ua iai le faamoemoe o le a taumafai e faalautele le Miss Samoa Ausetalia i le aai o Melepone i le tausaga fou ma le lumanai, pe a maua pea le malosi mai le Atua.