O le vaiaso lona tolu lenei o loo faagasolo pea le taamilosaga o le sailiga o le Ipu o le Lalolagi i le taaloga lakapi iuni. Matauina foi le lava tapena o Niu Sila i lana taligamalo.
E pei ona silafia, ua faatulagaina le tele o aai poo taulaga faatau i vaega eseese o Niu Sila e avea ma aai poo faiganuu e lagolago i aulakapi a atunuu eseese o loo autovaa mai.
E pei la ona iai le taulaga faatau i Manurewa, le South Mall, ua vaaia ai le siomia o faleoloa i totonu o lea foi tamai taulaga faatau, i fu‘a a le Malo o Uelese, e lagolagoina lana aulakapi a o iai i Niu Sila nei.
O le Aso Toonai talu ai, sa faia ai ni faafiafiaga a nisi o aoga i Manurewa, i le vaega tutotonu o le taulaga faatau a le South Mall, e faaopoopo atu i faafiafiaga auā lava le faamatagofie atili o le taligamalo a Manurewa mo le aulakapi a Uelese, faapea le mamalu uma o tagata maimoa o loo tafafao mai i Niu Sila i lenei vaitau.
Sa matagofie tapenaga a nai fanau, e pei ona latou laei ai teuga mai nisi o atunuu o le Pasefika.
O le vaega na muamua ona tatala ai faafiafiaga i lea taeao, o le vaega a le Taiala poo le Iunite Samoa a le aoga tulagalua a Finlayson, lea sa faia sa latou faafiafiaga o siva faasamoa.
Ua fetaui lelei le faafiafiaga na talamea ai le Taiala, ma faaali ai foi le latou togiga fou i lea aso; o puletasi matagofie a tamaitai, ma ie lavalava o alii.
O le Kulupu Faafiafia e lua vasega sa tuufaatasia i ai, o le Tausaga 7 ma le 8. O susuga i tamaitai faiaoga sa taitai maia le latou kulupu, o Janet Tavui, Elizabeth Elia, ma le faletua ia Saili Aukuso.
Sa faatasi atu foi i lea aso e faaalia atili le lagolago i le faamoemoe o le fanau, e lē gata i mātua, aemaise foi nisi o sui, e pei o Tai Lemuelu (TA tuai) Lupematasila o le Komiti Faatonu FPS, ma Nora Ioapo (uluai taitai o le Taiala).
