O le vaiaso na tea nei i le Aso Toonai na faatautaia ai se mafutaga tele e saili ai seleni mo le faatupega o galuega faatino a le Sosaiete o le Kanesa. O lea sailigatupe o le faafugaina o lauao ma le valiina o lauulu o i latou na ofo atu e faatino lea tulaga mo le sailiga o seleni auā le sosaiete o le Kanesa.
Na gata mai i le tolu tausaga talu ai na faia ai lea ituaiga sailigatupe ma na agai ai le Alii Palemia ma faafuga lona lauao ma nai tagata toaitiiti o le aiga o faipisinisi i totonu o Samoa.Mo lea lava faafugaga o lauao na maua ai se tinoitupe e $70,000 tala.
O lea faatoa toe vaaia lea ituaiga sailigatupe ma e silia i le to‘a 30 na ofo e faafuga o latou ao ae o le to‘a 19 na ofo e vali felanulanuai o latou lauao mo lenei faamoemoe.
Sa iai foi le alii Palemia lea na ia faafetaia ai le tumutumu na oo atu i le fale faafiafia o le Y-NOT i Matautu e faatinoina lea sailiga seleni.
O le afioga i le Minisita o Faamasinoga, le afioga Fiame Naomi Mataafa, na vali piniki lona lauao ma lana faamatalaga, e tāua tele lenei sailiga fesoasoani ona o se auala ese foi lea ua saili fofo ai i le toatele ua aafia i ituaiga kanesa eseese ua aafia ai.
O le tumutumu o lea aso na molimauina ai aiga o i latou ua maliliu i le kanesa poo aiga o i latou o loo togafitia i lenei gasegase. Na aofia ai se tamaitai fomai o loo nafa ma gasegase o le kanesa i tamaitai.
O Salote Vaai na ia ta‘ua o lana lea auala e faaali ai lona lagolago ia i latou o loo feagai ma ia ua maua i lenei gasegase ma o loo taofia i lenei taimi. O nisi ua ta‘ua le taumafai e ofo atu le fesoasoani e ala i foai tupe ona o le manatu e toatele tele tagata ua aafia ma e tatau lava ona iai se isi o aiga ma uo ua aafia ai.
O le afiafi lava lea e $150,300 tala na foai ai e le atunuu ae ese ai isi foai e pei o le $38,000 tala na foai e le BlueSky Samoa mo le Sosaiete o le Kanesa lea na foai atu i le faaiuga o le vaiaso na tea nei. Faaalia e Fesolai Vaaiga Tuigamala e ese foi le faafetai i le opogi e tagata Samoa o lenei taumafaiga ma ua faamautu ai lava le lima foai o tagata o le atunuu i soo se atinae auā le soifua maloloina o Samoa uma.
O le mau a le faafeagaiga ia Rev. Siaosi Salasulu o le EFKS i Vailele na auai atu i lea aso tāua, e lē na o le folafola o le alofa ae ia faatino le alofa i ē ua aafia i le kanesa e ala i le foai e mafai ona maau i ai le atunuu.
E oo lava i le fanau na faapea ona foai ma ofo atu o latou lauao e vali pe faafuga foi mo lea faamoemoe tāua.
O le sosaiete o le Kanesa i Samoa o loo i Motootua lona ofisa tutotonu ma e faamoemoe lava le faatupega o ana polokalame faalauiloa ma ana galuega, i tupe e foai atu e soo se itu o le atunuu.
