Ua manino i aiaiga o tulafono o faigapalota a Samoa o soo se sui e fia tauva o se tutoatasi (independent election candidate) afai e manumalo ae tumau pea lona tutoatasi e aunoa ma le fia lagolago i se vaega faaupufai (political party), e tumau lava ona avea ma faipule tutoatasi.
O loo silafia lelei e le faipule o Gaga‘emauga numera 2 le tofa Levaopolo Talatonu aiaiga ia o le tulafono o loo sosolo ai foi ma tulafono tumau a le Palemene, peitai ua ia faailoa e to‘a 16 sui tauva tutoatasi ua iai nei i totonu o se mafutaga e agai atu i le faatuina o se isi vaega faaupufai fou pe a manuia mai i le palota o le tausaga fou. O lea vaega faaupufai o loo tapena nei ma e lei maua sona igoa.
“O le mea e sili ona tāua ia te au ona o lea ua sefulu tausaga o o‘u saofai i totonu o upufai o Malo, ia lelei ona faafoe tiute o le Palemene, ma o le faamoemoe autu lea o se filifiliga ia te au ma nisi o loo lagolago mai e tatau ona iai se isi pati faaupufai i totonu o le Palemene”.
Na tapa le alii faipule i sona finagalo e faamanino ai tala salatua ua faapea mai o ia o loo fuafua e avea ma taitai o se pati faaupufai fou. “E lē sa‘o na tala ua alu solo, ae o a‘u ua aumai i ai le faatuatuaga o i latou o loo mananao e faavae se vaega faaupufai ae o le fesili poo ai o le a avea ma taitai o le mea lena e faatoa iloa pe a manuia mai ni sui tauva o loo i totonu o le matou mafutaga.” E toavalu ni sui faipule e manaomia e mafai ai ona faatu se vaega faaupufai ma aloaia i totonu o le Palemene, ma o aiaiga ia o tulafono tumau a le fono aoao faitulafono o loo iai nei.
O le numera foi lea o loo silasila Levaopolo ma i latou o loo faamaopoopoina sui tauva tutoatasi e fia maua i le faaiuga o le faigapalota ia Mati o le tausaga fou 2016.
Mo le silafia e le aufaitau, o le HRPP ma le Tautua Samoa o vaega faaupufai e lua ia o loo aloaia nei.
O loo faamaopoopo sui tauva a nei pati ma o le itu mautinoa o loo iai ma a latou sui tauva o le a taufetuli o ni tutoatasi. E mafua lea faaiuga a le HRPP ona e ave le faamuamua i faipule o loo umia nofoa o le Palemene, seia vaganā ua finagalo le faipule o le HRPP la te taufetuli faatasi ma se sui tauva i le igoa o le vaega faaupufai.
E mautinoa foi o se tulaga faapea o loo tapena i ai le Tautua Samoa auā e mautinoa afai e toalua pe sili atu ni sui e tauva i le igoa o se vaega faaupufai ae toaitiiti ni sui o se isi pati latou te tauva e ono mafai ona salalau tasi ai le lagolago a tagata palota ma iu ina sao mai ai se sui tauva o se vaega faaupufai poo se sui tauva tutoatasi.
Faaalia e Levaopolo o nisi o loia, ma tagata faigaluega sinia a le Malo ma nisi sa umia tofi faipule o le Palemene o loo i totonu o le latou mafutaga, ma o nisi o i latou o loo fuafua e tauva i le palota tele a le atunuu o loo loma nei.
O Levaopolo ua aveesea nei lona suafa mai le lola palota a le itumalo o Gaga‘emauga numera 2 ma ua lesitala nei i le lola palota a le itumalo o Salega. O le itumalo lea o le a tauva ai o se sui tutotasi i le palota o le tausaga fou.
O le suiga lea ua mafua ai ona faaalia i ni lipoti se faaiuga a le Fofoga Fetalai o le Palemene ua soloia ai le tofi faipule o Levaopolo. Peitai na saunoa mai le sui e lē mafai ona soloia lona tofi ona e ui ina suia le itumalo ua lesitala ai nei lona suafa ae o loo tumau pea le faaiuga o le faigapalota o le 2011 na filifilia ai o ia e Gaga‘emauga numera 2 e avea ma o latou faipule o le Palemene.
Ua faailoa mai foi e Levaopolo e lē o manino le tulafono i le vaega lea ua laga mai e le Fofoga Fetalai ma ua sauni e lu‘i lea faaiuga i le faamasinoga pe afai e tulai mai nisi tulaga pe a toe usuia le Palemene i le vaiaso nei. O le Aso Lua 17 o Novema 2015 o le a toe tauaofia ai le Fono Aoao mo ana fonotaga faaauau, ma o le a tulimatai ai ma le mataupu lenei.
