Lagolago e le aufai pasi i Samoa suiga o le itu auala

O loo taofi eseese lava le toatele o le mamalu o le atunuu i le mataupu e pei ona vavao ai nei si o tatou atunuu i Samoa, i le suiga o le itu auala o le a feoai ai taavale, e pei ona fuafuaina e le Malo e amataina i le aso muamua o le masina fou o Setema.
I nisi o lipoti o loo tele ina auina mai i luga o alaleo ma le televise, o loo taua ai le toatele o i latou e tetee i lenei fuafuaga a le malo.
Peitai i nisi o lipoti mai Samoa lava e pei ona faasalalau i le SamoaLive news o loo taua ai se saunoaga a le Ofisa Sili o le Pulega o Felauaiga i le Laueleele, le afioga ia Tusa Misi Tupuola.
Na saunoa Tusa: “Ua malilie uma lava le aufai pasi i le suiga o le itu auala. E le moni nei faaseā o loo feaveai solo e le au faasalalau tala e faapea e lei sauni le aufai pasi i le suiga o le a iai.” Na faamalamalama e Tusa, na talo e le Matagaluega o Galuega tetele a le Malo ma le Pulega o Felauaiga i le Laueleele se fonotaga ma le aufai pasi uma lava i Upolu i le aso 19 o le masina o Iulai, ae o le aso 26 o lea lava masina mo le aufai pasi i Savaii.
“O na fonotaga na taufai malilie uma ai le aufai pasi e lagolagoina le suiga o le itu auala”, e pei ona saunoa ai Tusa.
O pasi uma o le a laisene fua ia Setema, o le totogi masani o lena laisene e 1,800 tala Samoa pe $687 tala Amerika.
I se suesuega na faatautaia e le World Bank na taua ai, e tusa ma le 1,500 tala Samoa pe 572 tala Amerika e faaaluina i le suiga o faitotoa o pasi mai le itu taumatau i le itu agavale, ma fitu pe valu ni pasi i totonu o le atunuu ua uma nei ona faia i ai na suiga.
E pei foi ona taua i nisi lipoti e lei mamao atu, o lenei suiga o le a aafia ai na o pasi laupapa, ae o le a le afaina tele pasi ia na faatau mai atunuu i fafo (ready-made buses) aua o pasi na e tele ina faaaoga mo le faatafafaoina o turisi, ma le tele ni taimi e feoai ma tutu ai luga o le auala, ae faigofie lava i le avepasi latou ona faatulaga le pito e tuu ai le pasese aua e tele ina afe ese i tua mai le auala tele a le malo.
Taua e Tusa, e leai ma se faasea ua tuuina sao atu ia te ia, ae o le tele lava o le anoanoai o faasea ia e salalau solo nei, e mai tagata o loo nonofo lava latalata mai le taulaga. I le taimi nei ua silia ma le 2,000 taavale foeuli taumatau ua feoai nei i Samoa.