Lagolago e le asosi a foma’i le suia o totoga

Minisita o le Soifua Maloloina, Tuitama Talalelei Tuitama
Minisita o le Soifua Maloloina, Tuitama Talalelei Tuitama

O le suia o se totoga o se tagata soifua e pei o se faataitaiga o le aveese o lona fatuga’o ua faaletonu ae sui atu iai se fatuga’o o se tasi o lona aiga o loo lelei atoatoa, e le o se faiga tau soifua maloloina e masani ai lo tatou atunuu.

O le molimau a le toatele e moni e iai nisi o le atunuu ua faatino ni taotoga i le suia o se totoga ae o le 99 pasene o tagata e fou ia i latou lea faiga. O le fono faaletausaga talu ai nei a le sosaiete a foma’i i Samoa na faaleo ai e le sosaiete lo latou lagolagoina o lea tulaga ina ua faailoa e se fomai mai Initia e iai ona tomai i togafitiga tau i le suia o totoga e pei o fatuga’o le mafai ona faatino o lea galuega i Samoa.

O le fono lea a le sosaiete na faailoa ai foi e le Minisita o le soifua maloloina le lagolago e le Malo o lea galuega faafomai ona o le to’aselau o gasegase o fatuga’o o loo faamamā le toto i masini i le taimi nei e iai le taimi e le mafai ai ona gafatia e masini se numela toatele atu o ni gasegase ua faaletonu fatuga’o. E na’o le sefulu tala o loo totogi e le gasegase mo le faamamāina o le toto ae o tau o masini o loo faaaoga e taugata ma e le gafatia i le totogi o loo ofo atu e le Malo mo gasegase taitasi.

I se tasi o tala i le auaunaga tau soifua maloloina i Samoa, o togafitiga o le siakiina o tamaitai poo ua aafia i le kanesa o le cervical cancer ua talitonu se faiaoga polofesa o le Iunivesite a Otago o le a mafai ona iloa se numera o tamaitai i Samoa ua aafia ai pe a faaaogā faiga faatekonolosi faaonapo nei.

Faaalia e Polofesa Merilyn Hibma e toatele aiga Samoa ua motusia mafutaga ma e pele ona o le tuai iloa o se tamaitai ua aafia i lea ituaiga o kanesa, ae a faatino faiga faatekonolosi faaonapo nei e siaki ai le ituvai o tina ma tamaitai i Samoa o le a fesoasoani tele lea i le vave faia o togafitiga e puipuia ai tamaitai mai le gasegase. E manatu lea faiaoga Polofesa o le Iunivesite a Otago, a faaavagavaga ni fesoasoani mo Samoa e mafai ai ona faatino lea tulaga o se laveai lelei lea mo tamaitai o le atunuu.

E 2 miliona mo totogi e lei maua o foma’i

O le sefulu tausaga ua mavae o loo nunumi ai le Minisita o le soifua maloloina pe aisea na le maua ai siitaga o totogi mo nisi o foma’i, ae o le aofaiga foi lea o tausaga e lei maua faamanuiaga tau totogi mo foma’i ua silia i le sefulu ma ona tupu tausaga o galulue i le matagaluega.

Ua avea tapenaga o le toe tuufaatasia o lea auaunaga ua va’ili uma ai faaletonu i totogi ma pili e lei totogia e faia vave iai se fofo a’o lei toe foi le soifua maloloina i lalo o se pulega e tasi. E lua miliona tala ua ioeina e le Kapeneta e faatino ai le totogiina atu o faamanuiaga tau totogi mo foma’i e lei maua.

Ua tuua’ia pulega sa iai muamua o le auaunaga tau soifua maloloina i le lē faatinoina o lea tulaga aemaise o pili e pei o le eletise ua sefulu tausaga e lei totogia.

E lima miliona ua fuafua i le tala faaopoopo o le tupe ua i luma nei o le Palemene mo le faamamāina o pili ma aitalafu a le matagaluega o le soifua maloloina.

I faamanuiaga tau totogi mo tausi soifua e lei maua le long service o lea ua amata totogi atu ma le faamoemoe e tatau ona mae’a le masina nei ua maua uma, ma amata lelei ai le toe faatasia o le matagaluega e pei ona fuafua o le masina fou e tatau ona faatino ai le toe tasi o le pulega o le soifua maloloina.