E muamua pea le viiga ma le faafetai i le Atua ona o lona alofa ua mafai ai ona faataunuuina ma le manuia le faamoemoe sa taupoina, e pei ona faataunuuina ai i le aso 3 Tesema 2015 le faamoemoe o le fanau i le taina lea o a latou tatau.
O se miti sa tuuina atu i le Atua e nei auuso e toatolu, o Fata Eric Fitiafiafi Aumua, Fata Michael Taei Aumua ma lo la uso laitiiti ia Jason Talavale Aumua ina ia o latou faatinoina le laei samoa e pei ona laei ai lo latou tamā ia Talavale Maalo Aumua i tausaga e tele.
O nei tamafanau na fananau i Aukilani Niu Sila ae ua ova nei ma le 20 tausaga o alala i Sini Ausetalia ma o latou mātua, aiga ma fanau ma lo latou tuafafine ia Jenny Wiles, toalua ma le fanau, se‘i vaganā ai Jason Talavale Aumua o loo aumau nei i le lotoā a le Faith Bible College i Tauranga ma si ona toalua ma le fanau.
O se mitamitaga i mātua ma aiga ona o le naunautaiga o nei foi tamafanau, e ui ina ola ane i atunuu i fafo ae malosi lava lo latou loto Samoa moni e ala i le tautua i aiga i soo se mea. Ua sa‘o ai le upu, ‘O le tagata ma lona aiga, o le tagata ma lona faasinomaga.’
O lenei faamoemoe sa tapenaina lea e le Tufuga ia Susuga Su‘a Faamanatu Lafaele Suluape i Sydney Ausetalia.
Na lolofi ane aiga ma uo e tatalo ma tapuaia le faamoemoe pe ā ma le tolu vaiaso talu ona faatinoina. Malo le tali āu, malo le onosai ma le faamalosi ua tau lau o le faamoemoe sa outou tausinio i ai.
Faamatalaga na tuuina mai.
