Laei le alii tapiano a le Katoliko a Woodridge i le malofie

E mitamita le alii Samoa moni i lana tatau ae o le tamaitai i lana malu. O le malu ifo o le  afiafi o le Aso  Gafua, aso 5 o Aukuso, na matuai faatumulia ai le maota o le afioga ia Lefinealii Fosi ma Salu Hunt sa faia ai le samaga o le malofie sa ta ai le susuga ia Junior Taulaga‘aua, o le alo e faasino ia Iosua (Niue) faapea le tofa ia Tanumata‘ila‘ila Vaimanino Tofa Taulaga‘aua mai Faleasiu.
Na mae‘a lava le galuega tele i lea afiafi ona siitia lea o le taulaga faafetai e le afioga ia Patele Epati Tamati. O le Fofoga o le po o le tofa ia Apulu Lesina Uta‘i sa faaleoina  faaaloaloga ma e maeu foi le uigaese o tu ma aga masani e lē mafai ona tafea ma faagaloina.
Na matuai alo  aiga i lea afiafi  auā foi se inati mo le faatamā o le Puleaga Katoliko a o se matū palapala o le agiotupu, le meanai ma le falefa o le aiga salemalama faapea aiga, faapea nisi mai le Ekalesia Katoliko, uo ma aiga.
O le agaiotupu o le susuga ia Faamanatu Suluape. O le susuga ia Junior Taugala‘aua, o ia o se talavou e lauiloa aua o ia o le tapiano ma le faipese a le aulotu Katoliko Samoa ma le Palisi Katoliko a Woodridge.
Na ta‘ua e Junior o ia ua mitamita ma tau lau o lona faamoemoe ae maualuga le viiga o le Atua i le malosi sa ia maua na mafai ai ona faatino le galuega ua ia laeiina ai le  malofie, o le laei e fai i ai upu a le atunuu, e alu ma le tagata i le tuugamau.