Laalaa atu Sive Vaigā Ualesi i lana CD Numera 3

O lagona o le faaeaina pe a mae‘a se taumafaiga, o lagona o le faamalieina ma le loto faagaeetia. O nisi foi nei o faalogona e pōpō gatā i lalo aemaise pe a vaaia se moemitiga ua tino mai. E leitioa fai mai le Tusi, o sē lava ua fiafia inā pese ia.
O nisi nei o upu sa faamatalaina ai e le susuga ia Sive Vaigā Ualesi lona agaga faafetai ina ua tau lau o lona faamoemoe, ua amata ona tino mai lana taumafaiga mo le pueina ma le tuufaatasiaina o lana CD numera 3.
O le susuga ia Sive o se tasi o tamafanau mai le motu tele ua tulaga ese foi lona pale mai i le atinaeina o musika faaneionapo. O ona alalafaga i Samoa o Saipipi, Papa i Puleia ma Sili i Savaii.
O ona tuaa o Vaigā Ualesi ma Lemalu mai le afioaga o Vailoa. E toalima ona uso ma ona tuafāfine e toatolu, e latou te galulue faatasi i le atinaeina o le taleni musika aemaise foi o le lagolago malosi a si ona faletua ia Faaaloalo ma si o la alo.
Na amata fofoa mai lana taleni pese aemaise o le fatuina poo le lagiina o musika a o tātā i le fa‘aili a le Tavana Brothers Band 1997-1998, Savaiian Hotel Band 1998-1999, Tama o le Motu Band 1999-2000, Siliva Band (Tutuila), 2000-2002, Evaeva Band 2003-2006, Ifilele Band 2006-2010 seia oo lava i le taimi lenei o loo faafiafia i le Pacific Love Band (NZ) 2011-2013.
O le afiafi o le Aso Toonai nei i le falefaafiafia o le Paradise Nite Club i Otara o le a tatala aloaia ai le CD Volume 3 a le susuga ia Sive. Mo nisi faamatalaga atili pe o le okaina foi o se kopi o le CD, e faafesootai le numera 02102764934.