Kuata Miliona tala mo le malosiaga faafouina

O le tau lea o se galuega tele ua fuafua nei le amataga i lenei tausaga auā le aoina o malosiaga faafouina mo le gaosiga o le eletise i totonu o Samoa.
O le tele lava o le eletise o loo maua i Samoa ua gaosi faatasi mai i le suauu o loo faitau miliona tala le tupe o loo alu ai a le atunuu i tausaga taitasi, ae faapea foi le suavai ua mafai ona tuufaatasia i lenei galuega auā le gaosia o le malosiaga o loo maua ai nei le eletise i le atunuu.

O le faaiuga o le vaiaso, o lea ua sainia ai loa le amataga aloaia o le galuega tele o le a faatuina i Mauga Le Pu‘e i Upolu auā le gaosiga o le eletise mai i le savili atoa ai ma le malosiaga o le la faapea ai foi ma le suavai.

O le a fausia ai ni faatanoa vai tetele i Tiavi ma o le a pamu atu ai i le tumutumu o le mauga lea ua aoina ai le savili ma gaosi ai le eletise i le lumanai. O se kamupani mai i Saina ua tutū faatasi ma se kamupani mai i Samoa le Pro-com Solar and Wind lea ua faamautu mai lenei galuega tele.

O le kamupani mai i Saina lea e ta‘ua o le IES e ana le tupe lea ua faaaogā e faatutū ai nofoaga e ao ai malosiaga nei e tolu o le vai, matagi ma malosiaga maua mai i le la lea e tusa ma le $250 miliona tala Samoa e alu ai.

O le kamupani e faatautaia le galuega i le faataatitiaga o nei galuega uma, o le kamupani lea a le Zhen Ziang Thermal Power mai i Saina atoa ai ma le Pro Com Solar and Wind o se kamupani Samoa ma Niu Sila ua tutū faatasi.

O le aotelega o nei kamupani uma ua iai nei le kamupani e tasi lea ua faaigoaina o le Pacific Renewable Energy lea ua faatautaia nei lea galuega tele. E 20 tausaga ua tuu atu e le Malo i lea kamupani e faagasolo ai ana galuega i Samoa.

O sui o le kamupani Samoa nei o le afioga Nuu Tapasu Leung Wai ma Muaausa Joseph Walter o se tasi ua tele tausaga o pulea le Faalapotopotoga o Malosiaga tau Eletise.

O le faamoemoe o lenei galuega ina ia mafai e le kamupani lenei ona gaosi malosiaga faafouina nei ma faasoasoa atu i le atunuu e ala i le ofo atu o lenei auaunaga i le EPC le Malosiaga tau Eletise.

O le faamatalaga a Nuu, o le taimi lenei e $1.10 sene i le iunite o le eletise o loo totogi e le atunuu e ala i le cash power o loo maua nei ae o le kamupani a le Pacific Renewable o le a ofo atu le iunite e tasi latou te gaosia mai i Mauga o Le Pu‘e i le 55 sene i le iunite ma o se faiga o le a mautinoa le pa‘ū ai o le tau o le eletise e ofo atu i le atunuu.

Mo le Malo o Samoa, o se tali lenei i le tautinoga ua mae‘a faamautu a Samoa ina ia oo atu i le tausaga fou le tausaga 2017 ua ola uma Samoa i malosiaga ua gaosi mai i auala nei faafouina ma ia matuā faaitiitia ai le faitau miliona o tala o loo alu i tausaga uma auā le suauu o loo gaosi ai le tele o le eletise a le atunuu i le taimi lenei. O lea la ua tatala aloaia le amataga o lenei galuega ma le faamoemoe e mae‘a lelei lava i le tausaga fou lea e faamalosia ai suiga ua tautino Samoa e faatino auā le tali atu ai i suiga ogaoga o le tau.