Ua soo le lalolagi i le aufaafiafia a Whitireia mai totonu o lana vasega faafiafia (Performing Arts Course) i soo se tausaga. O le po o le Aso Lulu 12 o Novema na faatumulia ai le faleaoga i le lālā i le laumua a Whitireia New Zealand i le auvalaaulia faaaloalogia na molimauina le matuā saunia lelei o nei alo ma fanau ia latou faafiafiaga faa-Maori, faa-Samoa ma faa-Atu Kuki e pei ona aotauina ai.
E toafitu le aufaauu o le a alo atu e talia o latou faailoga (Bachelor in Applied Art) i le faaiuga o lenei tausaga. E toalua alo o Samoa o le tamaitai o Maria Puaula mai Iva i Savaii ma Jacoba Meafou, o le ‘afa Maori ‘afa Samoa, o le a faauuina ai.
O le tamaitai faiaoga (lecturer) o Taofi Mose-Tuiloma na ia aoaoina siva faasamoa o lenei faafiafiaga ma ua leva foi ona ia feagai ma lea galuega ina ua mae‘a lona faailoga mai totonu lava o Whitireia.
E faamalo ma faamanuia atu ai mo ia alo o Samoa o le a faauuina i o la faailoga faapea le galuega lelei a Taofi Mose Tuiloma mo o tatou tupulaga o loo aoaoina ai lea tomai matagofie.
