Ua faailoa mai e le susuga ia Richard Parker i le aai o Melepone, ua faamautuina le aso mo lana koneseti saili tupe faameaalofa (Charity Concert) mo le nofoaga o tagata matutua le Mapuifagalele, faapea foi ma le Ekalesia Metotisi i Matafele.
O le aso 19 o Tesema o le a faataunuuina ai le faamoemoe i le Maliu Mai Bar i Fugalei Apia, ma o le tamaitai o Verona Parker o le a avea ma Fofoga (MC) o lea aso faapitoa. Na saunoa le susuga ia Richard, ua leva ona iai sona lagona e fia fesoasoani mo le Mapuifagalele.
Na amata fuafua mai lenei faamoemoe i le tele o masina ua tuanai, e pei ona malaga ai i Niu Sila ma amata faataoto fuafuaga, lea ua mautu, ma o se agaga faafetai lea ona o le lagolago malosi a si ona aiga i Samoa aemaise o le mamalu lasilasi o tamalii o loo latou galulue faatasi.
Na ia saunoa foi o le taleni e lē mo na o sona lelei ma lona aiga, ae mo se lelei o le atunuu lautele, o le ala lea ua ia ofoina ai lana taleni ma lona taimi e faatino ai le koneseti i Samoa. O le maau foi ma le milomilosia ma seleni uma o le a maua i le faatauina o ticket mo le faamoemoe, o le a foaiina lea mo le Mapuifagalele faapea le malumalu o le Ekalesia Metotisi i Matafele.
Na faaalia foi e Richard ua ofoina le lagolago a nisi o tamalii pepese e faafiafia faatasi ma ia i lea afiafi, o le a faafofoga ai foi i le siufofoga pese tautala o le susuga ia Tony the Rapper Alesana.
O le a silasila foi i le alo fusu lauiloa le alii o Joseph Parker, o nisi o auaunaga pisinisi o lagolagoina le faamoemoe o le faletaimalo a le Valentines Motel i Fugalei, ma le faleoloa o le susuga ia Dave Parker i Apia o loo faatauina ai pepa ulufale mo le faamoemoe.
Na fesiligia e le Samoa Times Melepone Richard pe aisea lava ua osofia ai lagona foai mo le Mapuifagalele ma le Ekalesia Metotisi, ae na ia saunoa e lelei lava le oo mai o le valaau, ua fai sona aogā mo tuaa sinasina o le atunuu ma le Atua.
