Ua filifilia nei le alii o Ofisa Treviranus e avea ma kapeteni o le aulakapi a le atunuu, le Manu Samoa i lenei tausaga aemaise le taaloga ua alo atu nei Samoa e talimalo ai ia Iulai.
O ia lea o le a avea ma kapeteni o le aulakapi taitoa 15 a le atunuu i le la taaloga faitaulia ma le All Blacks a Niu Sila i le aso valu o Iulai aemaise isi taamilosaga e pei o le Ipu o le Pasefika ma le Ipu o le Lalolagi.
O le faiaoga taiulu o le Manu Samoa, o Stephen Betham na ia ta‘ua o Treviranus o se alii ua leva lava ona iloa lona tulai mai o se taitai o lenei aulakapi ma ua talafeagai lelei lava le tofia e taitai le ‘au a le Manu Samoa.
O Ofisa Treviranus na kapeteni i le au taitoafitu a le atunuu lea na manumalo i le taamilosaga a le IRB i le tausaga e 2010, ma na ia ta‘ua i se faatalatalanoaga, o lona tofiga i lea taimi e talitonu o le tofiga mai i le Atua ma o lona talitonuga foi lea i le tofiga lea ua toe faia ia te ia mo lenei taaloga faitaulia aemaise le aga atu ai foi o le Manu Samoa i taaloga tetele o le Ipu o le Pasefika ma le Ipu o le Lalolagi.
Faaalia e lenei alii o le mafuaaga lea o lona talia o le filifilia o ia e avea ma kapeteni o le Manu Samoa ona e tāua tele ia te ia lenei tofiga ma ua ia faafetaia le filifiliga ua tasi ai ia te ia lea faaiuga.
O le alii lenei na amata lava ona taalo lakapi a o aoga ai i le Kolisi o Leifiifi ma le Kolisi o Avele, ma o le unai a lenei alii i le faatalatalanoaga i lona tofiga lenei, o le tāua ia o le ola a‘e i Samoa ma taumafai atu ai lenei taaloga.
O lana lu‘i i fanau o loo taaalo i le lakapi i Samoa nei, e taulai taumafaiga ina ia maua avanoa i fafo mo le atinae o lenei taleni, ae ia aua lava ne‘i galo e lē na o le manao e faaeaina i le taaloga ae ia manatua le Atua i taimi uma o lenei taumafaiga auā a aunoa ma lana lagolago ma lana faamalosi, e fai fua uma galuega ma taumafaiga.
“O a‘u ou te tatalo ae ou te iloa lelei lava e leai se aogā o tatalo nei pe afai e leai ma se toleni ma le taumafai ina ia lelei la‘u taalo, ma o le auala lea e maua ai le fesoasoani mai le Atua,” o lana faamatalaga lea.
O Ofisa Treviranus e taalo i le foueki (utility loose forward) ma o loo taalo i lana konekarate i le kalapu o le London Irish ma na amata ona taalo mo le Manu Samoa i le tausaga e 2009 i se taaloga i le va o le Manu Samoa ma Tonga i le Ipu o le Pasefika.
