E masani ona tatou faafofoga i talosaga ma upu o tatalo e faapea “ia faaaogaina e le Atua o ana mea faigaluega”, o se isi upu e faapea “ia avea o vaa ma ipu o le tala lelei”.
E iai taimi e valaauina ai e le Atua se tagata e fai ma mea faigaluega i lona aao mo lana galuega. A oo la ina faaaogaina e le Atua le tagata o se mea faigaluega e mafai ona tatou talitonuina le aao o le Atua e pule lava o ia i le auala e faaaogaina ai le tagata poo le mea faigaluega.
E eseese galuega e faapena foi ona eseese o mea faigaluega e moomia e le Atua e faia ai lana galuega. I se isi faauupuga e le mafai ona tatou taotasi ma faapea o le auala lena e tatau ona fai ai. Poo le auala lea na tatou masani ai ma omai ai.
Aua o le Atua e ana le galuega o i tatou o ana mea faigaluega e pule o ia i le auala e faaaogaina ai o tatou ola ma outou soifua ina ia faataunuuina lona fingalo ma ia faia lana glauega.
O le manatu o le toatele o John Alexander Dowie poo Ioane Alesana Taui e pei ona tatou faasamoaina ai lona igoa, o se tasi lea o auauna a le Atua na ia toe lalagaina le faataunuuina o le finagalo o le Atua ina ia “Faaee atu o outou lima mo le faamaloloina o e ua gasegase”.
O mea e lauiloa ai Ioane Alesana o lona faatuatua, o le faamaloloina o mai, o le salamo o tagata ia latou agasala i taimi o ana sauniga.
E faitau miliona tagata na liliu o latou ola i le Atua talu ona faaaogaina e le Atua Ioane e folafolaina le tala lelei.
O se tagata na valaauina e le Atua o itiiti lava o ia. E atoa le ono tausaga o Ioane Alesana ae ua maea ona ia faitauina le Tusi Paia mai le Kenese e oo i le Faaaliga.
Na maua e Ioane le lagona o lona valaauina mo le finagalo o le Atua ina ua fitu ona tausaga, sa faapea ona naunau o ia ina ia ola faamamaina. E ui i lenei lagona i lona loto, peitai e lei malamalama atoa Ioane i le uiga ma le faatautaia o lenei valaauina.
O le sefulu tolu o tausaga o Ioane na ia malaga faatasi ai ma ona matua i Ausetalia. O le taimi lea ua atili le naunau o Ioane Alesana e faitau le Tusi Paia ma aoaoina le Upu. O se tasi o mataupu o le Tusi Paia sa faananau i ai Ioane Alesana Taui o le ‘Faamalologa’.
O le tupu ae o Ioane sa avea o ia o se tamaitiiti maimaia. O lona mai tumau sa iai o le manava tiga. O se tasi aso na ia faitauina ai le Tusi Paia ma ia malamalama ai i le finagalo o le Atua e uiga i le ‘faamalologa i le faatuatua’. Na tuuina e Ioane lona mai i le Atua mo lana faamalologa. Na faateia Ioane i le fofoe ese atu e le Atua o le tiga ua leva tausaga o feagai ma ia.
O lea vavega na avea ai ma mafuaaga o le sailiili atili o Ioane i le galuega o le ‘faafaamalologa i le faatuatua’. Ua malaga Ioane e aoaoina i le aoga Tusi Paia i le Iunivesite. Na tulaga ese Ioane i totonu o le Iunivesite ona e le gata i lona naunau i le Upu ae o lona taulotoina o le Tusi Paia.
Na faauuina o ia e avea ma faifeau i totonu o le falemai. Na avea lea galuega o se avanoa lelei lava mo Ioane e faalauteleina ai lona faatuatua ma lona iloa i tulaga tau mai ma le faamalologa a le Atua.
Na matua faateia le toatele o tagata i lauga a Ioane aua e tuu sasao lava faamatalaga ma e le fefe foi e tau le mea moni.
Na valaauina Ioane e fai ma faifeau i totonu o le pitonuu o Alma i Ausetalia.
Sa toatele na faitioina Ioane, ona o ana lauga ma ua oo nei i le tulaga feteenai ma faifeau o le ekalesia.
Ua tuuina nei ia Ioane ina ia faia sana faaiuga poo le a tumau pe faamavae ma le galuega faafaifeau.
Na faamavae Ioane ma le ekalesia i Alma. Ae lei pine ae valaauina e le ekalesia Faapotopotoga Kerisiano i Manly Beach. Na faafiafiaina le toatele o le ekalesia. Peitai e lei leva foi ae faamavae Ioane Alesana ona o lona le fiafia i le loto maaa o tagata.
O loo lagona e Ioane lona valaauina ma le finagalo o le Atua e faaaogaina o ia peitai na te lei matua manino lava i lona valaauina.
Na valaauina o ia ina ia faifeau i totonu o Newton i Sini Ausetalia. O le vaitaimi tonu lea na pesi ai se faamai tele ma sa maliliu ai le toatele o tagata. I nai vaiaso talu ona avea Ioane ma faifeau, ae ua sili atu i le 40 maliu ua ia tanuina o tagata o le ekalesia.
Na mamafa i le loto o lenei faifeau le faafitauli. Sa feteenai lona iloa o le Tusi Paia ma lona faatuatua atoa ai ma le mea moni o loo tupu i le soifua o tagata. Ua amata ona tupu malie ae i totonu o Ioane se loto ita i le tiapolo.
O se tasi aso a o nofo o ia i totonu o lona ofisa, na ia tusia ai ni faaupuga faapea i lana tusi. “Ua mafatia lo‘u loto i lou asiasi ma vaavaai atu i le toatele o lau aulotu o mamai. i ni nai vaiaso talu ona taunuu mai i lenei aulotu ae us sili atu i le 40 tuugamau ua ou luluina i ai lefulefu ma le palapala.
O fea ea le na te faamaloloina i lana fanau o mafatia? Ua leai se tatalo mo le faamalologa e faafofogaina e ona fofoga, peitai ou te iloa e le puupuu lona aao”. Ou te lagonaina le taufaifai mai o uo ma i latou ia te au i taimi ou te avatu ai se upu faamafanafana i e mafatia”.
Na faapea foi ona faamatalaina e Ioane ia le ‘mai’, o le fanau leaga. O lo latou tama o Satani. A o lo latou tina o le agasala. A o nofo pea Ioane i lona ofisa ma mafaufau i le Atua sa faapea ona ia tagi i le loto tiga ma le mafatia mo tagata ua maliliu ma i latou ua faanoanoa. Na ia tatalo i le Atua mo se feau faapitoa mo tagata.
I le tusitusiga lava a Ioane na ia taua ai e faapea: “Na ou tatalo i le Atua mo se upu. Ona taitaiina lea ma faaosofia au e le Agaga Paia e faitau le Galuega 10:38”.
Na faalototeleina nei Iaone i lenei fuaiupu o le Tusi Paia o loo taua ai e faapea “O Iesu le Nasareta o le na faauuina e le Atua i le Agaga Paia ma le mana o ia sa femaliuai ma agalelei ma faamalolo atu i ē na faatoilaloina uma lava e le tiapolo aua sa ia te ia le Atua”.
Na faapea ona tea le maligi o loimata o lenei faifeau ma faalototeleina nei e le Atua, ua ia iloa le auala e tatau ai ona faamaloloina tagata.
Na tatalo Ioane Alesana i le Atua ma ia faapea atu; “Le Atua e, fesoasoani mai ia te au ina ia ou lauga atu le Upu ia i latou uma o loo mamai. Ia ou tau atu o Satani o ia o loo faaleaga mai ae o Keriso Iesu o ia lava o loo iai le faasaolotoina, o loo tumai o ia e le liliu i le aso”.
A o faia lenei tatalo a Ioane ae sa ia faalogoina loa le patia pata mai o le faitotoa ma le laga mai o tagata o loo faapea mai “Ioane alofa mai faamolemole e sau e tatalo mo Maria ua tigaina lona mai”. Sa faapea ona faataalise atu Ioane Alesana ma alu atu i totonu o le potu o lenei teineitiiti.
E taunuu atu Ioane o loo iai le fomai i totonu o le potu ma sa ia vaaia lava le tigaina, ua u nifo i lona tiga tele. Na oso le ita tele o Ioane i lona loto ina ua vaai atu i le foliga o le teineititi o Maria.
E sauni atu le tatalo a Ioane ae faapea mai le tala a le fomai ‘lau susuga, e le o ala ea o le Atua o se mea lilo lea ia i tatou”.
Na atili oso ai le ita o Ioane ma faapea atu, ‘E leai, o le auala lena a le tiapolo, ae o le taimi lenei o le a tatou valaau i le laveai ma le faasaoloto ina ia faaleagaina faiga a le tiapolo”.
Na le fiafia le fomai i upu a le faifeau ma alu ese loa ma le potu.
Na punou le ulu o Ioane Alesana i tafatafa o le moega o Maria ma tagi atu i le Atua. Na le toe vaaia se gaoioi o Maria. Ua oso le popole o lona tina ma faitau pe ua oti lana tama. Na tali atu Ioane e leai e toe ola o ia.
Na tea ese atu le fiva ma na faafuasei lava ona nofo i luga le teneiitiiti.
Na faamalie ane le teineitiiti i lona tina i le umi na moe. Ma sa nofo loa i luga ma ua ai. Na taufai ave le alaga o le faafetai ma le viiga i le Atua.
Na faapea foi ona asiasi atu Ioane i le mea o loo gasegase ai lona uso ma lona tuafafine ma tatalo mo i laua ma sa faapea foi ona faamaloloina i laua i le taimi lava lea.
Na amata i lea aso ona malamalama ma manino Ioane Alesana Taui, i lona valaauina ma le ituaiga o mea faifaluega mo le galuega a le Atua.
Na lei toe iai se tasi o le ekalesia na toe mai. Na faasolo le tatalo o faamalologa a Ioane i tagata uma o le eklaesia ma lei toe oti se tasi i le faamai.
Faaauauina i le vaiaso fou
