O lagona o le fiafia na faaleoina e le toatele o mātua o le Kolisi o Otahuhu i le afiafi o le Aso Lua na tea nei, 3 Novema 2015, ina ua faaiuina galuega a le fanau i lenei tausaga faaleaoaoga.
O le tausaga 11 – 13 lea na faia le latou laugatogi i lea afiafi ma iloa ai le tulaga maualuga na oo i ai le taumafai a nisi o alo o le Pasefika o loo aoaoina i lea Kolisi. O se tasi o tamaitai na faamanuiaina i ni sikolasipi se lua, o le taitaiulu tamaitai (Head Girl) o Trecaine Tanirau (Paulo), lea na ia maua le sikolasipi o le Iunivesite a Otago ma Canterbury.
O se tasi o tamaitai Pasefika na iloga lona tulaga ese i lea afiafi na ia maua le Second Runner up i le Tausaga 13, o le tamaitai o Fiona mai Tonga. O le mitamitaga o nai mātua ma aiga i lea po, ona o le vaaia o suiga lelei o le Kolisi talu ona faavaeina mai.
