I‘u manuia le faamoemoe ole C4JC

Le autalavou ale C4JC
Le autalavou ale C4JC

Ole afiafi ole Aso Sa ua tuanai atu na faatinoina ai le polokalame faaolaola agaga ma faamasani ai tupulaga talavou e lē gata o Samoa ae o nisi atumotu ole Pasefika faapea ma nisi lava o atunuu, ale autalavou ua faaigoaina ole Anointed Cariers 4 Jesus Christ.

Ole toatele ole autalavou o alo ma fanau Samoa ae e filogia ma talavou mai isi atunuu, ole faafeagaiga foi ma lona faletua o Samoa foi, ma e matele lava ina faaaogā tu ma aganuu faa-Samoa male Pasefika ae laualuga ile olaga faale-Agaga male mulimulitai i aoaoga faale-Tusi Paia ae ole gagana Peretania oloo faaaogā i sauniga.  E silia ile sefulu autalavou Samoa sa valaauina mai ekalesia ma talitonuga eseese, faapea ma nisi o autalavou papalagi ma nisi o faalapotopotoga ma aufaipese papalagi.

Ole faamoemoe e pei ona faamatalaina ele taitai ole autalavou, ole asaina lea ole vaofilifili ile aai o finagalo ma loto o tupulaga ina ia galulue faatasi ae tuu ese le faailoga tagata, faailoga tapuaiga male faailoga lotu. E talitonu le tele o Kerisiano ile Atua e toatasi, o ia foi ole Atua e alofa lava ia, o nisi o autalavou na faapitoa o latou sao na maualuga atili ai le viiga ole Atua, ole autalavou ale Hume AOG ale susuga ile faafeagaiga ia Ps Enele male faletua ia Mesepa, ole autalavou ale Samoan Christian Fellowship mai le pitonuu o Thomastown ua faaigoaina ole Kingdom Builders ale susuga ile faafeagaiga ia Ps Chico male faletua ia Toa‘i, faapea foi le sao matagofie ole autalavou ale Ignite ale ekalesia Worship Center ile pitonuu o Sunshine a Ps Atapana Ete male faletua.

Na matuā iloga le sao ole aufaipese lauiloa ale Urban Praise lea foi e toatele talavou Samoa oloo pepese ai, aemaise le upu faauuina na laugaina ese talavou iloga i pesega tautala (rap) le alii o Markia.  Na iloga le lagolago ale kalapu lakapi ale Rebels, African Enterprises male Plenty Ranges Convention Centre.

E maualuga le viiga ole Atua ona na faaiuina male manuia le faamoemoe o autalavou ma vaaia le sagisagi fealofani o talavou uma sa auai. Faafetai mo i latou uma sa fesoasoani ma lagolago. Viia Keriso!