E lua tausaga na auauna faatala‘i ai le susuga a Tassi Metusela i le aai o Ueligitone, i finagalo o nai ona mātua ia Aunei Asotasi ma le tina ia Epenesa Metusela, ua maualuga le viiga o le Atua silisili ese, ona ua taulau o a la tatalo, ina ia aogā o la alo mo lona finagalo.
Na faataoto mamao le fuafuaga a nai mātua ma o la aiga, ina ia faamanatu faatasi le aulia o le 21 tausaga o Tassi, ma lona toe foimai i si o latouaiga, uai’umanuia le faatinoina o le finagalo o le Alii, o le Aso Faraile aso 2 o Mati na faatumulia ai le Town Hall a Bradmeadows, i aiga na lua, le Ekalesia ma le paia lasilasi o le valaaulia, e patipatia ma faamanuia le aso soifua o Tassi, ma toe faafeiloai atu ai i lona toe taliu mai i aiga, lana Ekalesia aemaise o nai ana uo, ma molimoli atu ai foi se faafetai ma se faamalo ona o le galuega ua iu ma le manuia.
O finagalo autū ia o saunoaga a susuga i faafeagaiga taulagi na taitaia le sauniga ma saunoa faalaeiau mo le alo o le Ekalesia.
O le susuga a Anapa Amilale Su‘a na fai ma fofoga o le aso. Suifefiloi faafiafiaga faa-Samoa ma Toga, a o tali le sua i taumafataga na sauni ma gaseseina e Maota & Elena Gatering.
Na faatumuina le siosiomaga o le aso i le agaga o faamanuiaga, mai i auauna totofi, mātua, aiga aemaise o ana uo ma aumea mamae, e aualofa atu ai foi le siufofoga o Samoa, le Apu FM Radio, aemaise o la tatou Samoa Times mo lou aso soifua Tassi Metusela.
