E 46-6 ‘ai na lami ai le Springboks i le Manu Samoa i lana taaloga lona lua o le Ipu o le lalolagi na faia i Birmingham. E ui o le naunau o le tapuaiga a Samoa i le lalolagi atoa mo se vavega i luga o le malae i se manumalo a la tatou ‘au, ae na lē mafai se avanoa i le feai o le Springboks talu mai lana faia‘ina ia Iapani.
E ono ni sikoa mataina a Aferika ma e tolu na ausia e le uigi ia JP Petersen i sala e lua a Michael Stanley. Na manaia le amataga o osofaiga a le Manu Samoa e ui na ova se sala muamua i le amataga a Andre Pollard i sekone amata mo ‘ai 3-0. Na toe vaaia le malosi o finauga a le Manu ma le Boks i le sikalamu ma osofaiga ma le polo semanu e maua ai se overlap a le Manu i luga o le laina 22 a Aferika ae o se pasi mamao a Stanley mo le uigi ia Alesana Tuilagi na faasalavei e JP Petersen ma faasasa‘o atu ai i le laina sikoa mo lana sikoa muamua. Na toe ova le isi sala a Stanley ma uma ai loa ‘ai o le Manu ae faaputu sikoa e lima ma sala a le Boks. Na lē fesoasoani le faaletonu o togi i laina i fafo a le Manu ma maua uma e le isi ‘au.
Ae na iai le avanoa e toe malosi mai ai Samoa i se sikoa a Tusi Pisi ina ua sui atu i totonu i le minute 61 mai se kiki na maua e Tim Nanai Williams mo Khan Fotualii ma Tusi Pisi. Ae peitai na lē faaaogāina e le laufali i se faaiuga faapea e pasi i luma. O le toe silasila uma a le lalolagi ana o se isi ‘au e taulia le pasi ma le sikoa. Ana taulia foi le taumafaiga a Pisi e sui ai le sipili o le Manu ma atili lelei ai se avanoa e toe sasao mai ai.
E uma le taaloga o pue pea ma finau le Manu ma le malosi o le Siamupini o le 1995 ma le 2007 lea ua matuā vevela mai ogaumu e laga lo latou toilalo na iai ia Iapani.
E ui o le 46-6 na malolo ai le Manu, ae ua sauni atu nei e laga lenei toilalo pe a fetaui ma Iapani i le Aso Sa nei.
Afai ua mafai e Aferika ona toe taliu mai, e mafai foi e le Manu ona faia ia Iapani ma faasolo atu ai loa e iloilo ma Sikotilani i se ‘au e lua i ai la tatou pulu e sao atu i le valu pito i luga. E leai ni manu‘aga tuga o le Manu Samoa vaganā ai le kapeteni o le Springboks ia Jean de Villiers ua ritaea nei auā ua faamaonia e fomai le afaina o lona auvae (broken jaw) i le taimi na fetoai ai ma Tim Nanai Williams i le taaloga ma le Manu Samoa.
Ua toe taliu atu nei le faiaoga ia Stephen Betham ma Namulauulu Alama Ieremia e toe fafau se isi taumafaiga mo Iapani.
