Ole lē lava ole malosi ona e lē o lava le koleni le tasi o faaletonu oloo mafua ai ona lē maua pagota e sosola ese ma le falepuipui i Tafaigata. Ua ioe le sui Komesina o falepuipui le tofa Ulugia Niui’a Aumua, ile tulaga lea ae ua ia faaalia oloo faia faamalositino a leoleo ole falepuipui ile siva faamalositino ole Zumba. “O lea e fai exercise a leoleo ma ole matou Zumba na amata mai ile tausaga e 2015”.
Ole finagalo ole sui Komesina ile itu lea na mafua ina ua fesili tuusa’o iai le tusitala ole Samoa Times poo le ā sona finagalo ile sa’i ale Palemia ma le tuua’ia ole lapopoa tele o nisi leoleo falepuipui e lē lava le malosi ma le tulaga ole fitness e tuli ai ni pagota e sosola. Ua faatusa ai ele Palemia nisi o leoleo lapopoa e pei oni tagata Iapani e taalo ile taaloga ole pii faasumo.
“Ole finagalo ole Palemia e leai se isi o matou e tali iai ae ole finagalo lava lena ose ta’ita’i ose Malo ae matou te fai mea faalogo ile Malo”. Ole finagalo lea o Ulugia le sui Komesina o falepuipui. Ole Aso Lua ua mavae na toe foi ai ile falepuipui alii pagota e toalua na sosola ese ile Aso Faraile i tua atu.
Fai mai le sui Komesina ole 4 ile vaveao ole Aso Lua na toe foi atu ai le solaaga a pagota, ole isi na oso atu ile faitotoa autu ole lotoā ole falepuipui ae ole isi pagota na a’e ile pa uaea ole falepuipui ise vaega i tua atu ole nofoaga. “Matou te iloa ole fefefe o pagota ina ua faalogo oloo sue faatapito e leoleo ua toe omai ai lava laua”.
Ole taimi na sosola ai nei pagota e lei mapu leoleo ole falepuipui ile feiloai atu ile aiga ose tasi o pagota na sola ei le pitonuu o Falelauniu. Faaalia e Ulugia sa fautuaina le aiga e alolofa a oo atu pagota ona toe momoli filemu atu lea ile nofoaga. “Oute iloa ole isi lea mafuaaga na vave ai ona toe foi mai le solaaga a pagota”.
Ole mafuaaga lea na talo ai ele pulega ole falepuipui le feiloaiga ma tusitala i Samoa se’i faailoa le latou faafetai ile atunuu na maua atu ai faamatalaga o pagota na sosola, ile ma le isi se’i faailoa ole taimi muamua lea ua sosola ai ni pagota ae ua toe foi filemu atu lava e aunoa ma le maua ise sailiga a leoleo. O ia alii pagota na faaalia ele sui komesina na mafai ona sosola i tua ma le sela na loka ai ma isi pagota ina ua talepe se tasi o faamalama e faapea mai le sui Komesina e fausia i laupapa ma ni u’amea.
Fai mai Ulugia ole taimi ole vaveao ua laga le au kuka a pagota mo le tapenaina ole meaai ole taeao ae maua ai ma le avanoa o pagota e sosola ina ua mafai ona talepe le faamalama ole sela. “O sela tuai lava nei i taimi o fausaga ole falepuipui i onapo o pulega ale Malo o Niu Sila ma ole mafuaaga lena ole faigofie ona talepe”.
Ole taimi nei e lē o toe Aso Sa i tua nisi o pagota pe a uma le lua vaiaso. O lea ua maua le Aso Sa pe a uma le masina. “E na’o le to’asefuluiva pagota oloo mafai ona Aso Sa, ae ole toatele oloo nonofo i totonu ole falepuipui”. Ua na’o Samoa le atunuu oloo mafai ona tatala le avanoa e Aso Sa ai io latou aiga pagota ua lata ina maea faasalaga ma pagota amio lelei ma usiusitai.
