O le teineitiiti 9 tausaga le matua o Florina na vaetama e mātua o le alii o Talalelei Faaulufale o Puipaa ma Safata e fai ma ona tuafafine laitiiti. Na mafua ona avatu e mātua o le taulealea le teineitiiti ona na maliu le tamā o Florina ina ua pule i lona ola.
O le aiga lenei e nonofo i Puipaa sa nofo ai ma le teineitiiti lea e faapea o le po o le aso 19 o Ianuari o le tausaga ua mavae 2014 sa matamata le TV a mātua o Talalelei ma le teineitiiti o Florina, ona faatonu lea o le alii e ona mātua e alu e faapuna le tipoti uila e fai ane ai se latou saimini.
E alu le alii e fai le faatonuga lea, ae o loo saofai le teineitiiti i luma o se kapoti o lo latou fale ma matamata le Televise, lea e faapea e matamata lava le teineitiiti ma taufaalili i lona tuagane o Talalelei. Na fai ane ipu saimini a mātua ma le teineitiiti i le po lea, ae ua ita le alii i le taufaalili a lona tuafafine fai.
Na aapa ai loa i le tipoti vaivevela ma asu ane i le teineitiiti. I le fofogaina o le faaiuga o le alii o Talalelei na faaalia ai e leoleo, na vaaia e le taulealea ua ese le tulaga ua oo i ai lona tuafafine ona ua tuga le mea ua ia faia, o lea na sola ese ai. E lua aso talu ona tupu le faalavelave ae faatoa alu ane i lo Alto aiga.
Ua atoa le tausaga ma masina e tolu talu ona tupu lenei faalavelave i Puipaa i le tausaga ua mavae na maliu ai lava le teineitiiti. Na ioe Talalelei i le moliaga o le fasioti tagata paivalea poo le manslaughter, ae na faaumiumi ona tolo lona faamasinoga ona sa manaomia e le faamasinoga se lipoti mai se fomai o le mafaufau e faamaonia ai o lē ua molia e aafia i le gasegase o le mafaufau.
Peitai e ui ina avatu le lipoti a le fomai e aafia le mafaufau o le alii ua molia i le migrane poo le ulu tiga ma oso faama‘i malosi i nisi taimi ia auga ma oo ai ina foliga e maua i le ma‘ilili poo le ma‘i māliu, ae na faaalia i le lipoti a le fomai o le mafaufau, na faatoa i ai ia auga i le taulealea ina ua tupu le faalavelave i lona tuafafine.
Na taunuu le suesuega a le fomai i lea tulaga, ona e lei oo atu lava Talalelei e vaai se fomai o le mafaufau i le taimi e lei tupu le faalavelave. Na ave i ai fualaau ma ua vaaia ai le manuia o auga na aafia ai ma ua fautuaina e le fomai le faaauau pea ona inu ana fualaau.
O le fautuaga lea a le faamasinoga i le pulega o le falepuipui ia faaauau pea lea tulaga ma ia avanoa atu le fomai o le mafaufau e asiasi i le taulealea i totonu o le falepuipui.
E talitonu le faamasinoga a tausisia lea tulaga o le a lē toe tulai mai le faaletonu na maliu ai le alii Niu Sila o Hans Dalton e aafia i le gasegase o le mafaufau.
O se tasi vaega o le faaiuga a le afioga i le faamasino o Vui Clarence Nelson ua poloaina ai le tuuina atu o le faila o lenei mataupu mo se suesuega a le faamasinoga mo maliu lilo, le coroner’s court, e mafua ona e lei faia lea tulaga e saili tonu ai mafuaaga o le maliu o le teineitiiti aemaise e lei faia se taotoga faapitoa e se fomai e patino i ai lea matafaioi.
O le tolu o aso talu ona maliu le teineitiiti i le tuanai o le sefulu aso o togafiti i tua i ni fofo samoa i ona manu‘a tuga mai le vaivevela na mu ai se vaega tele o lona tino, na faaatoa vaai ai se fomai i āuga o manu‘a, ma faia ai le faaiuga a le fomai o le ogaoga tele o ia manu‘a na mafua ai le maliu.
Peitai ua faaalia e le faamasinoga e lē o se fomai ua iai se agavaa na te faia ai se faaiuga i le mafuaga o le maliu. E sefulu tausaga na faavae ai le faasalaga a le faamasinoga ae na toesea tausaga e lima ona nisi o itu lelei mo lē ua molia, aemaise o lona ioeina o le moliaga.
Ua nofosala ai nei i le falepuipui mo le lima tausaga. O le Aso Lua o le vaiaso nei e fofogaina ai i le faamasinoga o maliu lilo le mataupu lenei ma valaauina ai molimau e sailia tonu ai le pogai o le maliu.
