Ioe e Tāua le Gagana Muamua mo Taunuuga Manuia o Aoaoga

Atonu o lenei mataupu ua talanoaina soo ua le gata i le letio, ae ua faapena foi i tusitusiga i le nusipepa. Peitai, oloo toatele pea nai matua ma le mamalu o si o tatou atunuu oloo manatu pea, o le gagana Peretania o le ala lea i malo o fanau i aoaoga.

Ua faamaonia i le tele o suesuega ma tofa liuliu le taua tele o le faaaogaina o le gagana muamua a le tamaitiiti, e faigofie ai ona malamalama i le gagana lona lua, mo le agai i luma o lona taumafai.

Ua faapea foi ona matauina i aoga oloo malamalama lelei faiaoga i tofa manino ma talitonuga oloo faalagolago iai nei polokalame, oloo faaaoga ai le gagana Samoa ma le gagana Faaperetania e aoao ai mataupu i totonu o aoga.

O se laasaga fou i nisi o aoga i totonu o Aukilani i Saute, le ausia e alo ma fanau o tulaga maualuluga o lo latou taumafai i nisi o iloiloga, ua latalata i le maualuluga oloo ausia e tamaiti ua manatu e popoto atu i lo tamaiti Pasefika.

Ua faamaonia ai le aoga tele o le faafoeina o nei polokalame, e tusa ma ana tofa manino ma ona talitonuga e pei ona faamaumauina.

E pei ona molimauina e se tasi o polofesa tautaua o gagana sa galue i le iunivesete a Waikato, ae ua galue nei i le Iunivesete a Aukilani, Stephen May, o le faafitauli tele oloo iai nei, o le tasi lava o le gagana oloo faaaogaina e faia ai fuafuaga uma mo aoga, ma aoaoina ai tamaiti, ae faatuatuanai gagana, ma lē amanaiaina tu ma aganuu a tamaiti o le gagana Peretania la latou gagana lona lua.

O se tasi foi o finagalo, “Faatoa taua lava le potu aoga pe afai e malamalama le faiaoga i le gagana ma tu ma aganuu a tamaiti oloo iai.

Faatoa talafeagai lava le aoaoga ma faigofie ona malamalama tamaiti, pe afai e fesootai ma o latou aiga ma saofaiga lautele ma a latou aganuu”.

I se tasi o tusitusiga a le au popoto i le aoaoina o tamaiti e aoao ia latou gagana lona lua, ua taua ai, e le tutusa faafouina a i latou oloo faatinoina polokalame e faaaoga ai le gagana muamua a le tamaitiiti ma lana gagana lona lua, ma faiaoga oloo galulue i potu aoga oloo faaaoga ai nao le gagana e tasi.

E tatau ona saunia lelei ni tomai mo faiaoga i polokalame oloo faaaoga ai gagana e lua, ona e le faigofie la latou matafaioi, ona o i latou oloo i o latou aao lumanai o fanau oloo i nei polokalame taua.

Atonu o le vaega tonu lea e tatau ona mataituina e matua ma sui i totonu o komiti faafoe a aoga, ina ia lagolagoina malosi nei polokalame mo le agai i luma o le taumafai o alo ma fanau.

E aoga tele le lagolagoina o susuga i faiaoga, ina ia faigofie o latou tiute e mafai ai ona latou saunia ni polokalame talafeagai.

O le popolega oloo iai nei, ona ua faaaogaina nei polokalame ina ia faateleina ai le numera o tamaiti i totonu o aoga, ae le lagolagoina e komiti faafoe ma pulega a aoga.

Ua na ona faatutu, ae le lagolagoina, ua matua faigata ai tiute a susuga i faiaoga oloo taumafai mo se lelei o alo ma fanau a Samoa mo a taeao.

O se tasi itu matautia o le talitonuga, o le lelei o le tautala ma le malamalama i le gagana, o le tusipasi lea o le faiaoga e mafai ai ona faafoe nei polokalame.

Peitai, e tatau ona iai le tomai ma le malamalama i tofa manino ma talitonuga o lenei polokalame, e mafai ai ona fetuutuunai ma fuafua auala talafeagai e faatino ai.

E matua taua tele nei polokalame, ae taua foi lo tatou galulue faatasi ina ia lelei ona faatinoina ina ia avea o ni polokalame anagata, a faataunuuina o tatou faamoemoe mo ni lumanai lelei o alo ma fanau.

Ae le gata i lea, o le faaolaolaina pea o la tatou gagana ma a tatou aganuu, o vaega ia o lo tatou faasinomaga, aemaise a tatou agatausili ina ia tausisia pea ao tatou aumau ai i nei atunuu. Manuia tele fuafuaga o lenei vaiaso.