O alii  Saina sa ioe i moliaga

O alii Saina sa ioe i moliaga

Ole Aso Lulu na amata ona tulai ai se alii ofisa sinia ole faletupe ole Bank South Pacific e molimau e lagolago moliaga o alii Saina e toalua oloo tuuaia i lo la gaoia oni tupe mai masini tala tupe a lea faletupe i Apia, peitai e oo ane lava ile Aso Faraile ua mavae oloo tulai lava lea tagata faigaluega e fai lana molimau ona o ia e iai le silafia i masini faaonaponei ale faletupe oloo pueina ata mai masini talatupe poo ATM.

O ata na pueina ma maua ai le gaioiga a alii Saina o Yang Quigreen ma Zhong Zhuiming sa avea ose molimau autu a leoleo ma sa faaaali i totonu ole potu faamasino ma faamatala ele molimau gaioiga uma oloo maua ile ata.

O foliga ma laei o alii Saina oloo maua uma ele mea pueta video oloo pipii ile masini talatupe. Na iloa ai foi ma le ata ole isi alii Saina e toatolu ai peitai o lea alii Saina na alu ese ma Samoa e lei pueina ma taofia e leoleo le isi toalua ua taofia nei e le malaga ese ma Samoa seiloga ua mae‘a ona suesue o la moliaga ma maua se faaiuga ale faamasinoga.

O moliaga e 17 o alii Saina ole fā ua la ioeina ma o moliaga ia e faasino ilo la gaoia o tupe peitai oloo tetee i isi moliaga e fesootai ma le la gaioiga na faia. Ole fale nofo totogi ose isi alii Saina sa faamautu ai le toalua oloo molia ma le isi toatasi ua alu ese ma le atunuu.

Na faaalia ele molimau a leoleo na oo atu alii ofisa mo le pueina o alii Saina ae na iloa loa ua oo atu leoleo taufetuli ile fogafale i luga ole fale sa faamautu ai ona o lea i totonu o potu ae loka.

Na faaalia ele molimau na o atu leoleo ma le alii Saina e ana le fale ma tatala potu ma aumai i fafo alii Saina ma agai atu loa ile ofisa o leoleo i Apia mo suesuega ma taofia ai loa.

Na faamatala le alii ofisa sinia ole faletupe i lana molimau ose isi gaioiga a alii Saina oloo molia ise tasi o masini tala tupe e oo lava ile lua itula o faatino gaioiga a ia alii, ole avane o card eseese ma sulu ile masini.

E fai lava ia gaioiga ma taunuu manuia ma mafai ona tala ni seleni mai lava ile $50, $500 ma le lua afe tala. Ose tasi o gaioiga na faia ile po ile tea ole valu ae mae‘a ua tea le sefulu na aveesea ai se tinoitupe e silia ile lima afe tala. Oloo faaauau ile vaiaso nei ona suesue molimau a leoleo i lenei mataupu.